Abantu mabanikwe abakudingayo emsakazweni
MHLELI, ziningi izinto ezenza abantu bathande umsakazo. Ziningi futhi izinto ezibacika ngomsakazo ezenza bagcine bengasawulaleli. Abanye bayaye bakhethe izinhlelo abazilalelayo ngenxa yezinto abazithandayo abazithola kulolo hlelo olubahlaba umxhwele. Nokho angizokulokhu ngifuna ukusika amaqatha ngoba vele aseqotshiwe, okwami ukuthi ngidle.
Ngike ngabuka ucwaningo olwenziwa inhlangano i-broadcasting Research Council of South Africa (BRCSA) ngezibalo zabalaleli emsakazweni kanye nakumabonakude. Lolu cwaningo olwangonyaka wezi-2017. Ngithe uma ngibuka ngiphinde ngiqhathanisa lezi zibalo kwafika umbuzo othi kungani imisakazo ilalelwa kakhulu phakathi neviki?
Ucwaningo lukhomba ukuthi bangaphezudlwana kuka-30 million abantu abalalela umsakazo phakathi neviki.
Ngezimpelasonto bangaphezudlwana kuka-20 million abalale- la umsakazo. Lapha kusuke sekuhlanganiswe lonke uhlobo lomsakazo olukhona eningizimu Afrika. Ukhumbule ukuthi lapha eningizimu Afrika sibalalelwa ngaphezu kuka 50 million ngokwezibalo zakamuva.
Ngezimpelasonto abantu abaningi basuke bengayile emsebenzini. Abantu abaningi maphakathi neviki basuke bematasa ngomsebenzi ababeka ngawo isinkwa etafuleni.
Isikhathi somsakazo basuke bengenaso kodwa izibalo zakhona ziyaphikisana nalokho. Lokhu kukhomba ngokusobala ukuthi kubantu abaningi umsakazo kubona ubaluleke phakathi neviki.
Ngalesi sikhathi yilapho besuke befuna ukuzwa ngezindaba ebezenzeka izolo nezingenzeka phakathi nosuku kuyaphambili.
Abanye basuke befuna ukuzwa ngesimo sezulu, isiminyaminya emgwaqeni kanye nokunye okusuke kubalulekile kubona ngalolo suku. Phela ziningi izinto ezisuke zikhulunywa phakathi neviki. Abanye basebenzisa ezokuxhumana ukuzwa ukuthi kwenzakani ezweni, bese belekelela ngomsakazo ukuqinisekisa lezo zindaba.
Ngezimpelasonto abantu basuke befuna umculo kakhulu ngalezi nsuku ezimbili. Isikhathi sezingxoxo basuke bengayingeni eyazo. Eziningi iziteshi zomsakazo ziyakwenza lokhu ukunika abalaleli umculo ohlukahlukene abangawuthokozela.
Pho kungani zingakhuli izibalo zabalaleli zidlule ezaphakathi neviki ngoba iningi labantu lisuke lingekho emsebenzini ngezimpelasonto?
Sengiyakhumbula ukuthi iningi labantu lisuke lisemicimbini eyahlukene, abanye basuke bezikhiphile, beyongcebeleka. Ngabe yizona zinto ezenza isibalo sabalaleli ngempelasonto singalingani nesaphakathi neviki? Okusho ukuthi baningi abantu abahlala ekhaya abasuke belalele umsakazo.
Phela ngeke ukwazi ukulalela umsakazo uma usemcimbini, ebumnandini noma emngcwabeni.
Phela kuya noma ngubani kulezi zindawo. Akufani nokuya emsebenzini lapho kuya khona abaqashwe ukuthi basebenze kulowo nalowo msebenzi.
Ngiyacabanga ukuthi imisakazo isengabubuyisa lobuya bumnandi bangezimpelasonto obabuthokozelwa kudala.
Ukuhambela imicimbi kanye nalapho kunobumnandi khona ngiyacabanga ukuthi bungazandisa izibalo zabalaleli.
Nanokuhlela imicimbi lapho kuzobe kuvulwe lowo msakazo osuke usungule lowo mcimbi uhambisane nezinhlelo zawo.
Lokhu kungenza nalowo ongajwayele ukulalela izinhlelo zangezimpelasonto zalowo msakazo agcine ehehekile ukuba azilalele lezo zinhlelo. Phela nokuhambela imicimbi eyahlukahlukene lokho kusuke kungukuyozitholela abalaleli - ufike ukhangise ngezinhlelo eninazo niwumsakazo ngezimpelasonto.
Abanye bangangcina bengasiboni isidingo sokuyophuzela kumaclub nakuma- tarven kodwa baphuzele endlini ngenkathi bevule umsakazo.
Mhlawumbe babize abangani bakhe ukuba bezophuzela endlini ngenkathi belalele umculo osuke uqhululwa kulowo msakazo.
Ngiyacabanga ukuthi ubusuku bangezimpelasonto kulapho imisakazo kumele iqinise khona imikhankaso yayo yokulalelwa ngoba basuke bedlala lezi ngoma abazofike bazithole kuma- club.
Kuningi nokungagwemeka uma bezophuzela endlini, balalele umsakazo.
Nanokuxhasa nje imicimbi esuke ihlelwe ngabangani, njengokuthi bazikhiphe beyozipholela endaweni ethile ngenkathi bethokozela iziphuzo nenyama.
Kulapho umsakazo uqhamuka khona nokuthi kulalelwe wona.
Lokhu kunika umsakazo ukuba uhehe labo abasuke belapho ukuthi babakhangisele nangezinhlelo abanazo emsakazweni.
Ngiyafisa ukubona abantu bekhula futhi bethola lokhu abakudingayo ngomsakazo. Lokhu kuphosela inselelo abaphathi kanye nabasakazi ukuheha nokuphinde bakhulise isibalo sabalaleli.
Themba Dlamini esikoko