USIZI LUZWA OLUNYE KUTHONGATHI FC
LUZOKUYA emidlalweni yeligi luxhuga uthongathi FC egijima kwinational First Division (NFD) ngemuva kokuhlawuliswa kanzima kukanozinti walo yikomidi eliqondisa izigwegwe, idispute Resolutions Chamber (DRC) ngolwesine, egoli.
Uthongathi luzobhekana netshakuma Tsha Madzivhandila kowenfd namuhla ngesonto ngo-15h00 ethohoyandou Stadium, evenda.
Lo mdlalo umqoka ngendlela eyisimanga kuthongathi njengoba lusengcupheni yokugencwa yizembe.
Nokho luzoya kuwona luxhugela njengoba umartin Mthimkhulu ongunozinti ehlawuliswe izinyanga eziyisi-6 engazihlanganisi nebhola.
Ulahlwe yicala lokuthuka onondweba uthongathi lubhekene neroyal Eagles koweligi emasontweni ambalwa edlule.
Ujackson Mojapelo oyisikhulu esiphezulu kuthongathi FC, utshele ILANGA Langesonto ukuthi unozinti wabo ube nephutha.
Uqhube ngokuthi kuningi abakufundile njengomakoti beligi.
Uthi ngeke balidlulise icala, bayasamukela isinqumo.
Umojapelo uthe: “Okubi wukuthi yisigameko sesibili eqenjini lethu ukuzithola sinikwa isigwebo esinzima. Uphilani Gumede oyisitobha ubambane ngezandla nomenzi Hlophe ongumdlali werichards Bay FC wathola isigwebo.
"Sifunde lukhulu ngale sizini. Ngezayo sizobe siyikilabhu ehluke kakhulu.
"Sizoba neqhinga lokuqwashisa abadlali ngendlela yokuziphatha ngaphandle nangaphakathi kwenkundla ukuze sizigweme izigameko ezifuze lesi,” kusho umojapelo.