ACUSHELWE UMGOGA AMAKILABHU E-NFD
ACUSHELWE umgoga amakilabhu adlala kwinational First Division (NFD) njengoba kuvela ukuthi ipremier Soccer League (PSL) isithole ukuthi kunezikhulu ezizama ukupheka imiphumela yemidlalo njengoba sekusongwa isizini.
Isimo sibi kwinfd njengoba namuhla ngesonto ngo-15h00 wonke amakilabhu akulesi sigaba ezogijima imidlalo eyandulela eyokusonga isizini.
Namuhla kungase kube khona ukukhala nokugedla kwamazinyo kwamanye amakilabhu njengoba kungase kwenzeke icace eyezembe kwathile.
Amakilabhu okuyiwona asemngceleni wezembe yirichards Bay FC, Ubuntu Cape Town, Super Eagles, uthongathi FC neroyal Eagles.
Selidume lawuthatha umthatha Bucks osekuqinisekisiwe ukuthi uyodlala kwi-abc Motsepe League ngesizini ezayo.
Sekusele isikhala seyodwa ezophelezela umthatha.
Nokho leli phephandaba lithole ukuthi IPSL icuphe umgoga onzima ukubamba labo abazozama ukupheka imidlalo.
Leli phephandaba lishayela umato Madlala oyisikhulu esiphezulu kwipsl ngalolu daba, uthe: “Angifuni ukukhuluma kakhulu ngonondweba ngoba akusibona abethu, abesouth African Football Association.
"Bayazi bona ukuthi basebenza ngaphansi kwesiqubulo sefifa esithi 'Fair Play'.
"Kodwa ngifuna ukukhuluma ngamakilabhu angaphansi kwami ukuthi siwabhekile ngoba siyazi ukuthi uma kuyilesi sikhathi kwenzakalani.
"Bese ngicela-ke nasemakilabhini ukuba ehlise imimoya ngoba onondweba yila benza khona amaphutha ngenxa yovalo.
"Ukuze sigweme izigameko ezifuze lesi sasemoses Mabhida Stadium, ngiyacela ikakhulukazi emabhentshini akungathi uma unondweba ejaja bese kuba yibona abasukuma kuqala ngoba abalandeli bavele bakholwe wukuthi bayarojwa, bese kusuka isixakaxaka.
"Kodwa-ke ngifuna ukukubeka kucace ukuthi siqaphile,” kusho umato.
Imidlalo YENFD isiyonke namuhla ngesonto iqhathwe kanje:
Ethohoyandou Stadium: Tshakhuma Tsha Madzivhandila vs Uthongathi FC 15h00.
E-ABSA Tuks Stadium: Pretoria University FC vs Stellenbosch 15h00.
Emakhulong Stadium: Highlands Park vs Black Leopards 15h00.
Eparow Park: Cape Town All Stars vs Royal Eagles 15h00.
Emhlathuze Sports Complex: Richards Bay vs Ubuntu Cape Town 15h00.
Evosloorus Stadium: Jomo Cosmos vs Super Eagles 15h00.
Epuma Stadium: Witbank Spurs vs Mbombela United 15h00.
Emthatha Stadium: Mthatha Bucks vs Real Kings 15h00.