ESKHALENI:
KUNESIGCAWU sezintatheli esasibamba nomunye wabaqeqeshi bekaizer Chiefs, namanje esingasuki emqondweni wami yize senzeka eminyakeni engaphezulu kweli-10 edlule.
Kwabe kuwumhla ka 19 kumandulo (September) ka-2004 lapho engabona khona ulaka lukated “Makepisi” Dumitru owabe ecija ichiefs ngaleso sikhathi.
Lesi sigcawu sasibamba simile emhhumeni ophuma abadlali ekings Park Rugby Stadium.
Ngangilindele udumitru oneme, kwazise ezakhe zaziqeda ukukhipha imoroka Swallows ngo-1-0 kowandulela owamanqamu weSAA Supa 8, ngegoli likacollins “Ntofontofo” Mbesuma owabe evutha bhe kuleyo sizini.
Udumitru wasibingelela maqede wakhwela wazehlela kunondweba owabe ephethe umdlalo.
Wamsola ngokudayisa abadlali bakhe kwabeswallows.
Wayegcizelela ukuthi igumbi lokushintshela lechiefs uzolifica lifana newodi yasesibhedlela yabalimele ngendlela abadlali bakhe ayethi babeklajwa ngayo ngabeSwallows.
Wasola unondweba ngokungabi nangqondo. Wazeseka ngokuthi kawukwazi ukucindezela ichiefs bukhoma ekubeni inkundla igcwele phama abalandeli bayo.
Wathi okwenziwe ngunondweba kwabe kuzoyingqongqisa inkundla ukuba ichiefs yaguqa. Wakhaca kabuhlungu othile owazama ukumkhalima.
Sekuwumlando ukuthi ichiefs yagcina ingayiqukulanga le nkomishi njengoba upitso “Jingles” Mosimane azibula ngayo esigqikini sokuqeqesha, eyidla nesupersport United khona ethekwini ngomhla zimbili kumfumfu (October) ka-2004.
Inkulumo kadumitru nendlela ayehlaziya ngayo izimo ezahlukene, ingibuyele ngibuka umdlalo wechiefs iwashiswa ijezi yifree State Stars ngo-2-0 kowandulela owamanqamu wenedbank Cup ngeledlule emoses Mabhida Stadium engomakhelwane neKings Park Rugby.
Kulo mdlalo kwangicacela ngisafika nje ukuthi kuzosuka udweshu kuwona. Izinkulungwane zabalandeli bechiefs zabe zidakwe zixathuka, zilibeka ngesihloko elokuthi kuzoshuba uma le kilabhu ihlulwa.
Okwabe kuphambili emilonyeni yabalandeli bechiefs wukudinelwa usteve “Mphathi” Komphela owabe ehlezi ebhentshini okokugcina kulo mdlalo njengomqeqeshi wayo.
Wesula emuva kwawo. Babethi bafuna ukumfundisa abantu ngokudlala ngemizwa yabo.
Ukomphela wadedelwa yizikhulu zechiefs ukuza ethekwini nje, wayesanda kuphuma ngesamagundane le kilabhu ihlulwa yichippa United ngo3-0 koweAbsa Premiership EFNB Stadium, egoli, mhla ka-7 kumbasa (April).
Esigamekweni sasegoli, ukomphela nabadlali bechiefs bahlaselwa yisigejane sabalandeli kwazise yayibukwa yizihlalo.
Nokho namanje okusangidida wukuthi yini eyadala ukuba angabi bikho obonayo kwichiefs ukuthi kuzobheduka udlame uma ingahlulwa ethekwini esebhentshini ukomphela, kunabalandeli abangaphezulu kuka 20 000.
Phela ukomphela ubesebame emphinjeni abalandeli bechiefs ngokuchitha amasizini amathathu engabanqobeli izicoco.
Isigcwagcwa esikhulu uzakhele sona egaxwa induku yi-orlando Pirates koweligi kuba ngu-3-1 EFNB Stadium zintathu kundasa (March).
Abalandeli bechiefs bayaziwa ezweni lonke ngokuthanda ukuchoma ngekilabhu yabo.
Ukomphela ubesebaphendule baphila kanzima, ngokujovwa ngabanye imihla namalanga, okuyinto abangayazi.
Nezinguquko ezisheshayo ethimbeni lepirates uma kunezinkinga, ngikholwa wukuthi zibe nomthelela kulokhu abalandeli beChiefs abasakubiza ngokufingqa imikhono, basuse umuntu obahlukumezayo kule kilabhu.
Nokho isenzo sabo sibi, sidinga ukugxekwa nxa zonke.
Nakuba kunjalo, nezikhulu zechiefs ziyadinga ukuzinuka amakhwapha ngomonakalo waseMoses Mabhida ukuthi zenzeni ukuwugwema ungakenzeki.
Phela le nkundla isale nomonakalo obalelwa ezigidini zamarandi ukuwulungisa.