Uramaphosa udabuka ngabashone emayini
I-AMCU ifuna kumiswe ukusebenza
UMENGAMELI wezwe umnu Cyril Ramaphosa usezwakalise ukudabuka kwakhe ngokufa kwezisebenzi eziwu-7, ezishone enhlekeleleni eyenzeke emayini yegolide isibanye-stillwater's Driefontein, ngasecarletonville, ewest Rand, egauteng.
Umnu Ramaphosa izolo ngoMgqibelo ukhiphe isitatimende sabezindaba ezwakalisa ukudabuka kwakhe ngemuva kokuba isibalo sabashonile senyuke safinyelela ku-7 njengoba ekuqaleni bekukade kubikwe abane abashonile.
Uthe bewuhulumeni neningizimu Afrika yonkana bazobeka emkhulekweni imindeni yalezo zisebenzi ezishonile, ezinye zazo eziqhamuka emazweni angomakhelwane okubalwa kuwo nemozambique.
Uqhube wathi wethemba ukuthi uphenyo ngale nhlekelele luzocacisa ngembangela yayo, futhi luholele ezixazululweni ezizosiza ukubhekana nokwenyuka okungemukelekile kwesibalo sezisebenzi ezishonayo ezimayini.
Ukushona kwalezi zisebenzi kulandela isigameko sokuvaleleka kwazo emathunjini omhlaba ngoLwesine, ngemuva kokuzamazama komhlaba.
Kubikwa ukuthi ezinye izisebenzi ezibandakanyeke kulesi sigamemo zisesimweni esibucayi kakhulu esibhedlela.
Inyunyana yezisebenzi zasezimayini i-association of Mineworkers and Construction Union (AMCU) ithi ukuphepha ezimayini sekuyindaba ethinta amalungelo abantu, futhi kufanele kuqiniswe umthetho ukuze izikhulu zezimayini zibhekane namacala okwehluleka wukuqinisekisa ezokuphepha.
I-AMCU ifuna ukuba kumiswe ukusebenza lapho kwenzeke khona le ngozi kuze kuphothulwe uphenyo.
Umnu Joseph Mathunjwa, onguMengameli WE-AMCU ugxeke umnyango wezokumbiwa phansi ngokwehluleka ukulawula imboni yezimayini.
Uthe basazoqhubeka nokuxoxisana nongqongqoshe walo mnyango, umnu Gwede Mantashe mayelana nokuphepha kwezisebenzi ezimayini.