Kuphenduka amatafula kwivuma FM
Lkakhulukazi kwi-prime time slots
KUZOPHENDUKA amatafula nonyaka ngokusho kwabaphathi bevuma FM esanda kwenza izinguquko ezinhlelweni ezibalulekile emsakazweni, ezaziwa nge- prime time slots. Lezi yizinhlelo eziphakathi kwehora lesithupha ekuseni kuya kwelesithupha ntambama.
Lo msakazo, usanda kwenyukelwa yizibalo ngo-400% zisuka ku-44 000 ziye zifinyelele ku-175 000.
Banelikhulu ithemba lokuthi kulezi okulindeleke ziphume ekupheleni kwenyanga kuzobe kukhulunywa olunye ulimi.
Oshintshweni olusha abalindele lubenzele izimanga bafake ekuseni ngo-6 uthandeka Dawn King, odume ngelikamangcobo emdlalweni uzalo.
Ungena ezicathulweni zikazeal Dladla osengowokhozi FM. Kulolu hlelo uhambisana nabebevele belusakaza, umakhosi Khoza nogabriel Sithole.
Olunye ushintsho abanethemba lokuthi luzobasebenzela ngolokufaka uleko (motion) Ngcobo ntambama kusukela ngo-3 emuva kokushiywa ngutrevor Phillips (TP) okubikwe ukuthi ulandele umndeni wakhe osuhlala phesheya kwezilwandle.
Uleko uzobambisana nonomfundo Mkhize obevele ekulo.
Upearl Sokhulu ongumphathi wesiteshi uthe: “Siseyizingane kulo mkhakha njengoba sisonyakeni wesihlanu kodwa kukude la siyakhona. Lokho kufakazelwa wukwenyuka kwesibalo sabalaleli nezindondo esiqokwe kuzo kumaLiberty Radio Awards anonyaka saze sanqoba eyebest Music Show.
“Sinethemba lokuthi ngonyaka ozayo sizokwenza kangcono kakhulu njengoba sesinalaba abasha ngoba phela lama award afana namasama emculweni. Sibambisene futhi nomasipala wetheku ezinhlelweni ezahlukene njengowegospel ID nakwikhonsathi enkulu yokuqala esizoba nayo mhlaka-16 June, lapho abaculi abavundululwa ngalolu hlelo lukamasipala bezoshiyelana khona inkundla nabaculi abakhulu.
“Sizophinda sihambisane nawo umasipala uma sekuqala ukuthungathwa kwabaculi ohlelweni lwalo nyaka lwegospel ID,” kusho usokhulu.
Umnu Patrick Bogatsu, onguMphathi wezinhlelo, uthi basesimeni abazethemba kuso njengamanje ngoba bayabaqonda abalaleli babo.
“Sengiqalile ukubona izinhlansi ohlelweni lwantambama selokhu kuqale uleko. Umakhosi ekuseni unendlela yakhe nje yokuhehela abantu engxoxweni nokwenza bamukeleke kalula kubalaleli.
“Umsakazo wethu ngowabantu abakhulile kodwa abancane ngaphakathi,” kusho ubogatsu egcizelela elikazakwabo lokuthi unyaka ozayo uza nezithelo ezimnandi ngenxa yezinguquko abazenzile.
Nalaba basakazi bathembisa ukuthi impela iyolala ibonene nabancintisana nabo.
Nohlelo lwabo lwaminyaka yonke lokuphisana ngokukhokhela zonke izindleko zomshado bathi luyabasebenzela kakhulu ikakhulukazi njengoba nonyaka lukhonjiswe nasohlelweni i-our Perfect Wedding.
Abevuma FM baphinde baqinisekisa ukuthi kakukho shintsho olukhona emini njengoba bekuzwakala ulucky Sefatsa kuleli sonto noke wenza lona lolu hlelo phambilini nolwenziwa nguntobeko Mabika.
Lokhu kushiwo ngowengamele ezokumaketha kulo msakazo utee Van Heerden.
zowakha@ilanganews.co.za