SEBEFUNA ESABAMNYAMA
ZIBALELWA ku-60 izinkampani ezigaqele ukungena esikhaleni sesiteshi sezindaba ebesibizwa nge-ann7 kodwa esesibizwa nge-afro Worldview.
Kusukela ngomsombuluko mhla ka-30 ku-ephreli, I-ANN7 ishintshe yaba yiAfro Worldview ngenhloso yokuzivuselela kabusha njengoba isiphethwe yinkampani i-afrotone Media Holdings, kamnu Mzwanele Manyi.
Phambilini inkampani imultichoice imemezele ukuthi lesi siteshi sizovalwa emoyeni ngomhla ka-20 ku-agasti nonyaka njengoba kuphela inkontileka engeke ivuselelwe.
Kuzokhumbuleka ukuthi lesi siteshi I-ANN7, ibiphethwe yiziqumama zomndeni wakwagupta ngaphambi kokuba sithengwe ngumnu Manyi.
Ngokusho kwabemultichoice, zingaphezulu kuka-60 izinkampani esezifake izicelo zokungena esikhaleni salesi siteshi uma sivalwa ngomhla ka-20 kuAgasti. Imultichoice iveze ukuthi nayo inkampani kamnu Manyi ivumelekile ukufaka isicelo. Uthe uma nayo ifakile ngeke kwenzelelwe kodwa kuzolandelwa imigudu efanele.
Imultichoice ihlose ukuvala lesi sikhala ngesiteshi sezindaba esiphethwe ngabamnyama. Kulindeleke ukuba imultichoice imemezele ekupheleni kukajulayi inkampani ezokwengamela isiteshi esizosakaza ku- channel 405.
Unkz Gugu Masinga, okhulumela i-afrotone Media Holdings, wenqabile ukuphawula ngokuzokwenzeka kwi-afro Worldview uma inkontileka yayo nemultichoice isiphelile futhi ingakwazanga ukuthola ithuba lokuba iqhubeke isakaze kule channel.
Uthe bazokwazi ukuphawula uma imultichoice isisithathile isinqumo ngenkampani ezovala isikhala se- channel 405. lucky.cain@ilanganews.co.za