Baxhimfane ebumnandini osomabhizinisi abadumile
Bekubangwa ubu goes here
BAMANGALELANE ngamacala okuhluthulana ngezibhakela nokugwazana osomabhizinisi ababili, omunye ongusihlalo kazwelonke wenhlangano yentsha, iprogressive Youth in Business (PYB) edlelana NE-ANC.
Umnu Malusi Zondo (osesithombeni), ongusihlalo WEPYB, ongomunye walab’ osomabhizinisi abathelane isibhaxu, uqale wayiphika walala ngomhlane ngeledlule indaba yokulwa nomnu Sakhile Thusi onenkampani yonogada, obuye enze imisebenzi nakuhulumeni.
Kodwa ugcine evumile ukuthi baphambanile ngenkulumo nomnu Thusi kwaze kwafika emandleni besecubana yodumo efourways, egoli.
Le Cubana yileyo okwasuka kuyo isidumo nyakenye ngesikhathi umnu Mduduzi Manana, owayeyisekela likangqongqoshe wemfundo ephakeme, eshaya khona owesifazane waboshwa, lamlahla icala.
Nakuba kungacaci kahle ukuthi yini ebangwe yilabo somabhizinisi kodwa kuthiwa ukungezwani kwabo yinto endala.
Omunye wabebekhona ngosuku lwesigameko, okhulume NELANGA Langesonto, uthi kakukho okutheni okubangiwe kodwa umnu Zondo uvele waqonda kuthusi wathi le yindawo yakhe (Cubana) nomanana, umnu Thusi makayeke ukuzitshela.
Uthi emuva kwalokhu umnu Zondo uzame ukumthela ngempa- ma, kwasuka isidumo wabe esephihliza okusabhodlela ezama ukugwaza umnu Thusi (ogcine eklwebheka esandleni), wabe esemcela udede endaweni yokupaka izimoto.
Kubikwa ukuthi kube ngongaphansi nongaphezulu, umnu Zondo waze wabanjwa ngomunye wabangani bakhe, wamfaka omotweni wahamba naye sekukubi impela.
ILANGA Langesonto linalo igama lalo mngani futhi uvumile kuleli phephandaba ukuthi nguyena ohambise uzondo.
Utshele leli phephandaba ukuthi imoto kamnu Zondo bayishiye endaweni yesigameko kodwa wanxusa ukungafakwa odabeni ngoba akangene.
Ethintwa YILANGA Langesonto umnu Thusi uthi ubezivikela kumnu Zondo.
“Nangonyaka odlule wake wangihlasela khona ecubana ethi ngiyazitshela, wangishaya ngebhodlela. Ngiyabona uzogcina engibulala. Mhlawumbe unenkinga ngoba ebona izinto zingihambela kahle,” kusho uthusi.
Ethintwa YILANGA Langesonto umnu Zondo ngeledlule uqale wayiphika indaba yempi.
“Abantu bayazakha phela izindaba ngoba befuna ukufeza izinhloso zabo, bangenza noma yini ukudicilela isithunzi somuntu phansi. Thina sisebenza ipolitiki ngakho kunabantu abazohlala beqhamuka behlanekazela izinto, ningabanaki. Kangizange nje ngilwe naye,” ubesho kanje.
Ushaye ungqimphothwe emuva kwesikhathi, wavuma ukuthi balwile. Uthi vele banomlando wokungaboni ngaso linye nomnu Thusi kodwa akazi ukuthi babangani.
Kulesi sigameko sakamuva uthi ubuze umnu Thusi ukuthi kungani ezenza iphoyisa kubantu abasondelene naye (uzondo), kodwa ebe engelona.
Emuva kwalokho uthi uvele wadinwa umnu Thusi, wabe esemshaya.
Esitatimendeni sabezindaba asithumelele leli phephandaba uthi: “Ngize ngalanyulelwa ngabathile abebeseduze ngaleso sikhathi.”
Uyayichitha eyokuthi uzame ukugwaza umnu Thusi ngebhodlela.
Bobabili balinikezile leli phephandaba izinombolo zamacala abawavulile edouglasdale Police Station, nalapho u- constable ongenalo ilungelo lokukhuluma nabezindaba ekuqinisekisile ukuthi avuliwe.
Uconstable G S Mndlovu, okunguye okuthiwa kumele aphawule ngokusemthethweni, ubengatholakali ehhovisi kwaze kwashaya isikhathi sokushicilela.
Umaurie Devilliers, okhulumela abamacubana enhlokohhovisi, ugcine engayiphendulile i- email acele ukuthunyelelwa yona ngalesi sigameko ngesonto eledlule.
Uthusi ungomunye wosomabhizinisi abebekhala ngokwebelwa imfuyo ngabakhiqizi bomdlalo Isibaya esibike ngakho phambilini.