SELUQINILE UKHAKHAYI KU-K.O
ISILOMO se- hip hop sithi sifunde lukhulu ngokuhlukana kweqembu iteargas nangokuwa kwenkampani yaso, icashtime.
U-K.O, ogamalakhe langempela nguntokozo Mdluli, uzakhele udumo eqenjini iteargas kanti utshele ILANGA Langesonto ukuthi kuningi akufundile ngokuphatha abaculi, yingakho esegxile ekunakeni owakhe umculo.
Lo mculi, osenenye inkampani ethi yena ebizwa ngeskhanda Republic, uthi akasenaso isikhathi sokunabukelisa abanye abaculi, usebhekene nokuthinta yena kuphela.
“Ngicabanga ukuthi ukuzibambela mathupha kwiteargas yikhona okwenze ngaba nyamanambana kwazise ngigcine sengiyimenenja yeqembu ngoba bengizikhandla ukuze iqembu liphumelele.
“Kuthe noma sengiqhamuka nesu lokuqala icashtime kwaba sengathi ngifuna ukubaphatha abanye ozakwethu,” kusho UK.O engafuni ukucacisa ngembangela yokuhlukana kwaleli qembu elaba nedumela.
Uthi nangesikhathi esekwiCashtime, nakuba bebebathathu beyiphethe le nkampani, kodwa iqhubu ligcine liphuma naye njengoba abaculi abaningi bebekhala ngaye.
Kwicashtime UK.O ubebambisene nozakwabo kwiteargas, uma-e ogamalakhe langempela ngu-eezy Hanabe nothabiso Khathi.
Uthi nalapho ubezibambele, kunguyena okhiqiza izingoma zabanye abaculi abebengaphansi kwenkampani okubalwa kubo ukid X nonomuzi Mabena.
“Ngithe sengigxila kokwami kwaba sengathi angisabanakile ekubeni bese ngikwenzile obekumele ngikwenze,” kusho lo mculi okhiphe i- album yakhe ngonyaka owedlule ngaphansi kweskhanda Republic.
Uthi kule nkampani nguyena umculi, akazimisele ukusayina abanye. Usanda kwethula nezimpahla zakhe zokugqoka eziqanjwe ngayo le nkampani kanti ukhiphe ingoma nodj Maphorisa enesigqi segqom.
“Kubalulekile ukuthi noma siyicula i- hip hop kodwa singagudluki esigqini saseningizimu Afrika ngoba yisona esenza sihluke kweyaphesheya,” kusho lo mrepha wodumo lwezingoma icaracara, yiskhanda Love nezinye kanti muva nje kunenye edlala kakhulu emsakazweni esihloko sithi Swagganova.