Ingumuntu onesizotha, ofundile inkosi yamanyuswa
UYINKOSI yesizwe sakwaNyuswa Kwamlamulankunzi, Ozwathini, ephokophele ukuba isizwe sayo sithuthuke ngokwemfundo namakhono ekubeni nayo qobo iyincwadi efundekayo kuwo umkhakha wezemfundo.
Sikhuluma ngenkosi Muziwenhlanhla Mduduzi Ngcobo, ongomunye wamakhosi asemancane ngeminyaka Kwazulu-natal. Uzalwe ziyi-10 kumfumfu (October) 1987.
Sibe nenhlanhla yokuba isiphe ithuba lokuba siphole nayo kule ngosi kwelinye lamahhotela aphambili ethekwini. Sike sathi ukudukelana ngoba besingazani, yaze yangifonela ngiyibuka kwaba yihlaya khona lokho.
Yincwasimende yensizwa ehlanzekile, isho ngesihluthu sayo esikanyiwe. Ayikufihli ukuthi iyinhlalisuthi, ingumnazaretha ongazenyezi, ikhulumela phansi.
Izalwa yinkosi engasekho umusawenkosi Pitsho Ngcobo, owakhothama yona le nkosi inezinyanga ezintathu esiswini sikanina uthandi umakhomo, wasemthwalume Kwazulu-natal. Kwaba yishwa ukuthi umkhulu wayo, inkosi ungonyama ikhombe indodana yayo upitsho ukuthi kuzothi uma ikhothama kuthathe yona kanti izokhothama ingakabusi.
Kwayona inkosi ungonyama, wakhothama ngawo unyaka we-1987 inkosi umduduzi isencane, kwabiza ukuba ibanjelwe isikhundla.
“Okuhle wukuthi ngesikhathi kukhothama ubaba kwadingeka ukuba kufunwe ukuthi alikho izinyane owabe elishiyile kwatholakala ukuthi umama ubesezithwele, athokoza amaNyuswa.
“Ngithathwe ngayothukuswa kwababekazi umamkhukha, Otimati, Kwamaphumulo. Ngikhule khona ngifunda ngaze ngaqeda ibanga ugrade 6 Otimati Primary School, ngaphinde ngayofunda emzimkhulu e-ibisi Senior Secondary School lapho ngiphothule khona ugrade 12 ngonyaka wezi2007.
“Ngaphasa kahle ngamalengiso ezifundweni zescience nakumathematics. Ngibe sengidlulela e-university of Kwazulu Natal ngonyaka wezi-2008 ngenza izifundo zepolitical Science & Development Studies. Ngithweswe iziqu ngonyaka wezi-2012,” kusho inkosi ungcobo.
Inkosi ungcobo ithe yaqhubeka ngonyaka wezi-2012 yenza ihonours In Public Policy, yethweswa iziqu ngonyaka we-2013, kwathi ngonyaka olandelayo yenza imaster of Science in Public Policy, yenza ucwaningo ngesihloko esithi “The role of Traditional Leaders in a Democratic South Africa yazuza eze-masters ngonyaka wezi2017.
Ibe nenhlanhla le nkosi yokuba ibambe itoho emnyangweni wezokubusa ngokubambisana nobuholi bomdabu.
“Yilapho-ke engithole khona ithuba lokuqeqesheka ezindabeni zamakhosi, kusukela ngonyaka wezi-2015 kuya kowezi-2016. Kuthe noma sengibizwa yisizwe ukuba ngizothatha izintambo ngonyaka owedlule akwaba nenkinga,” kubeka inkosi ungcobo.
Kumanje izokwethula isihloko sayo nenqubo yocwaningo lwayo enyuvesi yasewestern Cape, ngaphansi kweso likasolwazi Bheki Mngomezulu, ukuze izuze iziqu zobudokotela kwezemfundo ezibizwa ngephd.
Inkosi ungcobo idla amazambane ashisayo uma uyibuza ngempilo yayo yangasese kodwa igcine ivumile ukuthi kusemnyama amehlo, ayikamthathi undlunkulu wayo, nokho inazo izingane ezintathu ezithandayo. Ivele ithi: “Ngisemncane kabi, ngisafuna ukuqeda ukufunda bese ngibhekana nezimo zokwakha umndeni.” fundisa ukuthi uma isabela ingathi “We! noma ibuzwa ingathi “Hhi?” wathi ayothi ayizwanga.