Izitayela ongazenza ingane ebusika

SEKUCACELE noma ngubani ukuthi ubusika sebufikile. Umoya obandayo wasekuseni nantambama, ukukhumbuza ngisho kungabe usukhohliwe ukuthi sekungesinye isikhathi sonyaka.

Njengoba sishintsha indlela esigqoka ngayo, nakanjani nendlela esizinakekela ngayo kumele ishintshe, kusukela ekunakekeleni umzimba kuya ezinweleni.

Izinwele zijwayele ukuba sebhadini lokuba zigcine zishiyeke ngaphandle uthole ukuthi umnikazi wazo uyoze azinake ngoba nakhu esebona zihlehla noma seziqathaka ngenxa yomoya ongemuhle ozishiya zomile.

Umummy Mthembu-fawkes ongumnikazi we-earthy okungumkhizo wezinwele, ukhulume nebhuku idestiny ngokubaluleka kokunakekela izinwele zabantwana njengoba sekuqala ubusika.

Uthi lesi kakusesona isikhathi sokuba izinwele zidedelwe kodwa ngesokuba zilukwe ukuze zivikeleke.

Uthi isitayela esihamba phambili ekuvikeleni izinwele ngesibizwa nge- benny-and-betty ngoba kasisilimazi isikhumba futhi kasizidonsi izinwele. “Lesi sitayela sihamba phambili ezinganeni zamantombazane. Kumele kuqinisekiswe ukuthi kasiqini,” kusho yena.

Uthi inhloso yalesi sitayela wukuvikela izinwele lapho zigcina khona, hhayi lapho ziqala khona yingakho eqinisekisa ukuba zingadonswa.

“Okubalulekile wukugcina izinwele zisesimeni esihle futhi zivikelekile. Uma zilukwe ngendlela yokuba zivikeleke, kazihlephuki noma ziphume njengoba bekuzokwenzeka uma zidedeliwe,” kusho yena.

Umummy uthi uma umqhina wena umntwana, mchazele ukuthi asho uma ezwa ubuhlungu. Ngokusho kwakhe, ayikho le nto yokuthi ubuhle buyabekezelelwa.

Uma kungukuthi umntwana uluka e- salon, tshela omlukayo ukuba athambise isandla, nomntwana umyale ukuba asho uma ezwa ubuhlungu.

Amathiphu ongawasebenzisa ukunakekela izinwele zomntwana:

- Ebusika izinwele ziyoma ngenxa yokubanda nama- heater asetshenziswa endlini. Kubalulekile ukuba uzigcobe ngaso sonke isikhathi. Sebenzisa amafutha emvelo njenge- coconut oil ne- shea butter ukuqinisekisa ukuthi izinwele zithamba kahle ngaphambi nangemuva kokuziluka.

- Izingane ezisafunda isikole kulula ukuba zingcole ekhanda. Uma ikhanda lengane yakho lihlale lijulukile, kubalulekile ukuba ligezwe nge- shampoo njalo ukuze lihlale lihlanzekile.

- Uma izinwele zidedeliwe zigcobise ngasekugcineni ukuze zivikeleke ekomeni nasekuhlukaneni. tzondi@ilanganews.co.za