SIHLAZIYA UMCULO
UMCULI: SGWILI ISIHLOKO: UKUSHO KWAKHE UHLOBO LOMCULO: GOSPEL
UNYAKA: 2018 AMAPHUZU: 9/10
KUPHELELISIWE kule albhamu, bazobhema bakholwe abathandi be-gospel. Usgwili sengathi ubekhulekile wazila ukudla ngesikhathi eyihlanganisa.
Ugcobo luzwakala engomeni yokuqala kuze kube sekugcineni. Izinsimbi zibumbene namaphimbo. Istudyo sigqishile, ukhubashe uyihlelembe ( mastering) yathula du. Ziyi-14 sezizonke - kukhona ezidumisayo nezigxumisayo, umzalwane wesimame angayidlali uma ephekile ngoba kuzosha amabhodwe. Iyatholakala ezitolo noma kubuzwe kuye kule nombolo ethi: 060 304 9449 noma (031) 031 6313. UMCULI: NQOBILE ISIHLOKO : MANGIPHELA AMANDLA UHLOBO LOMCULO: GOSPEL
UNYAKA : 2018 AMAPHUZU : 8/10
UFIKE kwezwakala unqobile - uyadumisa kuqhasha idimoni lishiswa umlilo ophuma emlonyeni.
Ithi icula le nsizwa ibuye iphonse intshumayelo phakathi, ijulile. Ingoma yesibili esihloko sithi “Mangiphelamandla” ayivumi ukuphuma enhliziyweni uma isike yangena. Ziyi-14 sezizonke. Uphrojusile lapha usgwili kanye naye unqobile Mbandlwa. Kukhona nezingoma ezihuba sazayoni. Isiyatholakala ezitolo UMCULI : PHATHWA KAHLE ISIHLOKO: UMA NGIBIZA LELIGAMA
UHLOBO LOMCULO : GOSPEL
UNYAKA: 2018 AMAPHUZU: 7/10
LENYUKILE izinga kubaculi baseswazini. Eminyakeni engama-40 eyedlule, bekungaba yisimanga ukuthola abaculi abacula ngale ndlela.
Uphatha Kahle akasiye umafikizolo kule ndima. I-albhamu yakhe yokuqala yabe isihloko sithi “Kukhona okuzokwenzeka” yalandelwa ngesihloko sithi “Ingadlangadla” nethi “Sekonakele” njengoba esekhiphe lena manje. Yi-albhamu yokuthengwa lena, iyabusisa. Iyatholakala ezitolo zomculo.