Zibalulekile ezokuthutha nokuphepha embonini yezokuvakasha
NGOKWEDLULE sikhulume ngezinsika ezintathu ezisemqoka ekusimamiseni imboni yezokuva- kasha.
Ngaphandle kwensika esemqoka eyisimo sezombusazwe esinozinzo, futhi esiphawule ukuthi uhulumeni waseningizimu Afrika ubonakala kungathi uyaphumelela kuyo, siqagule izinsika ezintathu okumele uhulumeni azisukumele: yinhlanzeko ezindaweni zomphakathi, uhlelo lwezokuthuthwa komphakathi, nezokuphepha.
Ngempelasonto yephasika lalo nyaka sikhulumile ngensika yenhlanzeko ezindaweni zomphakathi. Sichazile nokuthi phela le nsika yiyona eyisibuko abasibuka ngaye abantu bakwamanye amazwe ukuthi siluhlobo luni lwabantu.
Njengoba kuleli sonto elisombulukayo kusasa kuzovulwa umbukiso omkhulukazi wamazwe omhlaba wezokuvakasha, itourism Indaba, ethekwini, kusemqoka ukuba siyiqedele indaba yethu ngezinsika ezisemqoka embonini yezokuvakasha, okuyisihloko sezokuphepha kanjalo nesohlelo lwezokuthuthwa komphakathi olusebenza kahle.
EZOKUTHUTHA UMPHAKATHI
Ezokuthuthwa komphakathi ezihamba kahle futhi ezithembekile yilona luphawu lokuqala olubonisa ukuthi lelo lizwe selithuthuke kangakanani.
Omunye umhlomulo izwe eliwutholayo ngemboni yezokuvakasha wukuthi phakathi kwezivakashi bayabakhona nosomabhizinisi okuzothi uma belithandile izwe, bafikelwe wumqondo wokuzotshala izimali zamabhizinisi kulelo zwe, kusizakale abantu balapho ngamathuba omsebenzi.
Ukuthuthukiswa kwezokuthutha yinto ebhekene nohulumeni ngqo, njengoba ithinta ingqalasizinda nokuhleleka kwamadolobha nokuxhumanisa izindawo ezahlukene ngemigwaqo.
Uma-ke le migwaqo seyikhona, kudingeka ibe nezinto zokuhamba phela. Imizila yokuthutha abagibeli kudingeka ihlelwe ngendlela exhumanisa izindawo ezithandwa yizihambeli.
Isibonelo, izinto zokuthutha umphakathi akufanele zisheshe ukuphela ukuze kuthi nalabo abasuke behambele imicimbi ethile ephela ebusuku bangazitholi sebephoqekile ukuba babize amatekisi anquma intengo yohambo ngewashi (metered taxis) ukuze babuyele ezindaweni abahlala kuzo.
Phela izihambeli eziphuma kwamanye amazwe zisuke zithembele kakhulu ezintweni zokuhamba zomphakathi.
Okuhle ngohlelo lwezokuthutha umphakathi uma lusebenza kahle wukuthi, okokuqala lwethembekile ngoba aluncikile ekuthini ize igcwale abagibeli leyo nto abahamba ngayo.
Okwesibili izinto zokuhamba zomphakathi zihamba ngesikhathi esinqunyiwe, okuyinto ebaluleke kakhulu kubavakashi ngoba kwenza bakwazi ukuhlela isikhathi sabo sokwenza izinto ngoba okokuhamba kuyaziwa ukuthi kuzoba khona nini, kuphele nini.
Kusemqoka ukuba wethulelwe isigqoko umbono wemboni yamatekisi okungowabomdabu nabaqhamuka nawo izinto zimelene nabo ngenxa yobandlululo.
Uma-ke isikhona le mboni okulandelayo wukuthi isingethwe kanjani. Kungasiza ukuba labo le mboni esezandleni zabo baqonde ukuthi kunoma yiluphi uhlobo lwebhizinisi, ingwe mayidle ngamabala ukuze wonke othintekile aneliseke.
Futhi kumele baqonde ukuthi ukuze umgibeli athokoze, izidingo zakhe (umgibeli) mazibhekelelwe ngendlela efanele, bangaxhashazwa kodwa baphathwe ngenhlonipho.
Njengamanje isithombe sodlame nokungayikhathaleli impilo yabagibeli, imithombo yezindaba ehlala ibika ngakho zonke izinsuku, senza nabantu abebezozishiya emakhaya izimoto zabo ukuze bonge imali, bagcine sebenquma ukuhamba ngazo ngisho nasemizileni enesibalo esanele sezinto zokuthutha umphakathi.
Nemibiko yokuhlukunyezwa kwabathutha umphakathi abasebenzisa uhlelo lwe-uber ne-taxify, akubasizi labo abayizimbangi.
Isibonelo, izinkampani eziqashisa ngezimoto njengo Avis, Imperial no-budget zivula ama- bhizinisi azo endaweni eyodwa, njengasenkundleni yezindiza noma edolobheni, kodwa awukaze uzwe kuthiwa babambene ngezihluthu kubangwa amakhasimende.
Empeleni umbono webhizinisi ophumelelayo yilowo oncike kakhulu ekuphatheni kahle amakhasimende, okuyinto engesiwona umlingo.
Ukuthi ingwe idla ngamabala yinto okumele iqondwe yibo bonke abangabanikazi bezimoto abazimele nokuyibona ababambe iqhaza kule mboni yezokuthutha, esikhundleni sokwanda kwemibiko yombhobho wesibhamu odla lubi kule mboni.
EZOKUPHEPHA
Noma yikuphi emhlabeni, ukuphepha komphakathi ezigebengwini kuhamba phambili ukuze impilo iqhubeke.
Ngisho nalapho kuthiwa kunezinye izinto ezingekho, kodwa uma kuphephile, lokhu kuyamnikeza ovakashile isiqiniseko sokuthi uyobona izindawo afisa ukuzibona qede abuyele ekhaya kumbe ezweni lakubo ephephile.
Nayo lena yinsika esemahlombe kahulumeni ngqo ukuba kube nesiqiniseko sokuthi iyasizakala imboni yezokuvakasha ngokuqina kwezokuphepha.
Ubugebengu noma ngabe obaluhlobo luni lukhinyabeza noma iyiphi inhlobo yebhizinisi, ngakho nemboni yezokuvakasha ngeke isale ngaphandle.
Ababonisa izivakashi izindawo ezithandwayo kubenza beswele umgodi wokucasha uma izihambeli abazisingethe ziba yizisulu zobugebengu.
Ake ucabange nje ngesivakashi esitheleka eshashalazini lezindiza, singakawuphefumuli ngisho nomoya walelo zwe, sithole ukuthi sekunyamalele ezinye zezimpahla zaso.
Nakanjani lowo muntu ngeke esabona lutho oluhle kulelo zwe.
Futhi ayashabalala amathuba okuba angabuya kulelo zwe noma alincome kwabanye abanesifiso sokuvakasha kulo.
Isithombe esibi ngezwe esisuke sesakhekile emqondweni wakhe ngeke sisacima unomphelo.
Empeleni lokhu ngisho kuyisehlakalo esibizwa ngokuthi yi- petty crime, ngolwasemzini, kuyacasula kakhulu ukwedlula nobugebengu obukhulu obuhleliwe ngongqondongqondo bezigebengu.
Umbono osobala othi ukubonakala kwamaphoyisa ehambahamba emphakathini uyasebenza. Siba ngcono isimo uma izigebengu zibona amaphoyisa esobala.
Ukukhala ngokuthi isibalo samaphoyisa akhona asenele akusiyona impendulo egculisayo kumkhokhintela kwazise ukukhula kwesibalo sabantu ezweni kusho khona phela ukuthi nesibalo samaphoyisa kumele senyuke.
Nokuminyana kweziboshwa emajele akufanele kube yinto osekumele kuthiwe yenziwa wukonakala komphakathi kuphela.
Yebo, nakho ukuba buthaka komphakathi kunawo umthelela kodwa nakho ukukhula kwesibalo sabantu kuzisho khona ukuthi isibalo samajele naso kuyadinga sinezelwe ngangezibalo zokwanda kwabantu.
Leli phuzu liyangena kwesikhuluma ngakho lapha ngoba phakathi kokunye esikubona kwenzeka wukukhululwa kweziboshwa ngohlelo lwe- parole, kanti kwesinye isikhathi zisuke zingakakulungeli ukubuyela emphakathini njengoba zibuye ziqhubeke nobugebengu.
Ngaleyo ndlela imboni yezokuvakasha nayo ingagcina ithelwe ngamachaphazelo. Kuningi okunye esingase sikuphawule ngale ndaba kodwa esingenele isikhala sokukusho konke lapha.