Uzifela ngomculi okhulele emgaqweni
UKUKHULELA emndenini oswele kukadenis Masinde Onyango (32) ongunozinti wokuqina wemamelodi Sundowns yikhona kanye okwenza aphilele ukuvikela nokuphatha ntofontofo umndeni wakhe.
Ubambe elikhulu iqhaza idowns ibuyisa isicoco se-absa Premiership esihlwithwe yibidvest Wits ngesizini edlule. U-onyango udabuka ekampala, e-uganda.
Uthi ukukhulela ekhaya eliswele kakuzange kumthene amandla futhi kwamgqugquzela ukufaka umfutho ukufeza iphupho lakhe kunobhutshuzwayo.
Ufunde erailway Primary, entanda Secondary nasecitizen High lapho ephothule khona umatikuletsheni. Uqhubeke nemfundo ephakeme enza ibachelor of Administration angazange ayiphothule ngenxa yokuxinwa yibhola.
Uthi akaboni ukuthi usazokwazi ukuqhubeka nemfundo kwazise imali ayithola ebholeni iyamenelisa. Ikhono lakhe ligqame ngesikhathi edlalela isportin Club Villa FC abeyisheba nokufunda ngaphambi kokufudukela kwist George SC yase-ethiopia ebidlala kwiligi enkulu yakhona.
Iphupho lakhe lifezeke ejoyina isupersport United ngo-2006 wayishiya ngo-2010. Ngemuva kokuzibonakalisa kwisupersport uthathwe yidowns ngo-2011 kodwa yambolekisa kwimpumalanga Black Aces isizini eyodwa. Ngesizini elandelayo idowns imshove kwiBidvest Wits.
U-onyango sekuwumlando ukuthi uke wahlabana ngomklomelo we-uganda Sports Press Association kanti necaf ike yamklomelisa ngokuba ngunozinti wonyaka.
Usenqobe izindondo eziningi kusuka ethathe ijezi kwidowns kubalwa icaf Champions League ngo-2016 necaf Super Cup ngo-2017. Ingxoxo YELANGA Langesonto ( IL) no-onyango ngempilo yakhe yangaphandle kweNkundla ihambe ngalolu hlobo:
IL: Lukhona yini ulwimi lwabantu baseningizimu Afrika osukwazi ukulukhuluma njengoba sekukudala wafika kuleli?
Onyango: Ngiyasizama isizulu. Ngeke umuntu akwazi ukungihleba ngaso kwazise okuningi sengiyakuzwa. Engikuthanda kakhulu ngaleli lizwe wukuthi abantu bakhona bayakwazi ukwamukelana. Sengizizwa ngingowalapha.
IL: U-onyango ungumuntu onjani?
Onyango: Ngingubaba wezingane othobekile, futhi ohloniphayo. Nokho kangikwazi ukuncetheza. Ngikholelwa ekutheni umuntu kumele ngimtshele emehlweni uma kukhona engingahambisani nakho akwenzayo.
IL: Usushadelwe?
Onyango: Yebo, ngithathe ubarbara. Sibusiswe ngabafana abane uramzi, ukyle, udeon nodario ongumagcino.
IL: Abafana abaningi kangaka, uzimisele ukwakha iqembu lakho yini?
Onyango: Cha, cha, cha (esho efa wuhleko). Sengenele ngalaba abakhona. Sengivalile manje.
IL: Uphuma ekhaya elinjani?
Onyango: Ngihlengezela izinyembezi uma ngikhumbula isikhathi engidlule kusona ngisakhula. Bekunzima kakhulu. Ngenhlanhla enkulu unkulunkulu ukwazile ukungihlenga. Ngitholane nabantu abangisizile empilweni, kubalwa umilutin Sredojevic ololonga i-orlando Pirates.
Ungisize kokuningi kubalwa nemfundo. Ungidodisile, ngakwazi nokuvusa ikhaya ngekhono lami lokuvimba. Nakuba besihlupheka ekhaya kodwa besingalali singadlile.
IL: Ngabe basaphila abazali bakho?
Onyango: Yebo, umama ngu-olivia Onyango, kanti ubaba ngugabriel Onyango. Sibabili abafana njengoba ngizalwa no-ivan ongumfowethu omdala, elanywe ngodadewethu ababili uhelen Ajmbo noLillian bese kuba yimina umagcino.
Abazali bami yibona okumele ngibachome uphaphe lwegwalagwala ngokungikhulisa kunzima. Kangifisi ukubona izingane zami ziphila impilo engiphuma kuyona.
IL: Yikuphi ukudla okuthandayo?
Onyango: Ngithanda i- rice nenyama yenkukhu. Lokhu kudla ngikukhonze kakhulu, ngisho sihleli ehhotela yikhona engikuthokozelayo. Engikuthanda nakakhulu wukuthi nomkami uyalishaya ibhodwe.
IL: Usichitha kanjani isikhathi sakho uma ungekho enkundleni?
Onyango: Ungithole ngesikhathi esikahle kakhulu ngenza into engiyithandayo okuwukuhambela izinxanxathela zezitolo nomndeni wami. Njengamanje ngisesun City (enorth West) nomndeni wami.
Isikhathi sekhefu singenza ngithole ithuba elihle lokuhlala nomkami nezingane zami. Phela ibhola lidla isikhathi esiningi somndeni. Umuntu uhlala esendleleni ngokomsebenzi. Ngeke ukholwe ukuthi ngidlala nazo izingane zami uma ngiphumule ukuzijabulisa nokusondelana kakhulu nazo.
IL: Yiliphi izwe ozifela ngalo?
Onyango: Yimorocco. Kuhle impela khona futhi okuningi
kuqoqene kahle ndawonye. Abantu bakhona bacishe bafane nabasemzansi ngobumnene. Bayalazisa usiko futhi kabacwasani nhlobo.
IL: Usebenzisa nhloboni yesiqholo?
Onyango: Yipolo Black by Ralph Lauren, ingenza ngizizwe ngizelwe kabusha ngaso sonke isikhathi uma ngiziqhole ngayo.
IL: Yiluphi uhlobo lomculo oluthandayo?
Onyango: Ngigezwa wumculo opholile wernb. Nokho umculi engikhonze ukumlalela ngu-eddy Kenzo wase-uganda. Ngimthandiswa wukuthi ukhule eyi- street kid okwenza konke okwakhe kungithokozise. Kungifundisa ukuthi emhlabeni konke kuyenzeka uma uzinika isikhathi. Unkulunkulu uyahlengana empilweni.
IL: Uphatha nhloboni yeselula?
Onyango: Yisamsung yesimanje, ikwenza konke. Okuhle ngayo wukuthi ngiyakwazi ukungena ngayo kwitwitter, kufacebook nakwiInstagram. Inhloso enkulu yami ngokuba sezinkundleni zokuxhumana wukuzwa izimvo zabalandeli bami.
IL: Uhlala nobani endlini uma niyogijima ekuhambeni?
Onyango: No-anthony “Sika Lekhekhe” Laffor kwazise sisuka kude naye ngebhola sisayibambe kwisupersport United.
IL: Uhamba ngamotoni?
Onyango: Yijeep 5. Okwenza ngathenga le moto wukuthi nginomndeni omkhulu.
IL: Yiluphi uhlelo oluthandayo kumabonakude?
Onyango: Yiprison Break.
IL: Uyasonta? Onyango: Ngiyiprotestant lokuqina futhi kangikhohlwa ukuya enkonzweni.
IL: Yikuphi ongaphuma nakho kuqala uma kusuka umlilo endlini?
Onyango: Ukukhipha izingane zami, amagilavu okuvimba namakhokho kwazise yikhona okuyithuluzi lami lokuphila.
IL: Yimuphi umbala owuthandayo?
Onyango: Ngithanda umbala obomvu kwazise ngiyaye ngizibone ngikhanya kuhle kwelanga kuwona.
IL: Yisiphi isilwane osithandayo?
Onyango: Kasikho. Ngizeseba kabi. Kangifuni ukusondela kuzona.
IL: Usenazo izinhloso zokuyodlala phesheya kwezilwandle?
Onyango: Uma kwenzeka livela ithuba ngiyoya. Ngiyazi ukuthi bonke abadlali bebhola emhlabeni jikelele bayafisa ukugijima emaligini amakhulu emhlabeni.
IL: Unazo izinhlelo ngemuva kokubeka amakhokho ethala?
Onyango: Ngihlela ukwenza izifundo zebhola ukuze ngiqhubeke nokufaka isandla entsheni esakhula, ngisize nokuhlwaya abadlali. Phela ibhola selifana nomjovo kimina.
IL: Uthini umlayezo wakho entsheni?
Onyango: Mayibe nogqozi, ingalilahli ithemba empilweni. Kumele yazi ukuthi ifuna ukwenzani empilweni.
Kakumele ithathe izinqumo ezingalungile. Kumele inga
zihlanganisi nezidakamizwa.