ESKHALENI:
SEKUSELE umngcwabo maqede kugezwe amahalavu kunobhutshuzwayo waseNingizimu Afrika njengoba sekukhunyulwe amagilavu, sezihlephulana bukhoma ngenqindi phakathi kukadanny Jordaan ongumengameli wesouth African Football Association (Safa) noIrvin Khoza ongusihlalo wepremier Soccer League (PSL).
Inkombankombane yalezi zikhulu izoshayelela isipikili sokugcina ebhokisini lomngcwabo webhola laseningizimu Afrika ikakhulukazi eleqembu lesizwe, ibafana Bafana.
Sekunesikhathi lezi zikhulu ziyinkukhu nempaka, kodwa zikwazi ukuyimbambatha le mpi yazo.
Ukhoza usole ujordaan ngobuxoki ngemuva kokumhlekisa inhlinini kwi-extra Ordinary Congress yesafa ebingomgqibelo odlule egauteng.
Kuse ngakusasa sekugcwele kwabezindaba ukuthi ujordaan uvulele ukhoza icala lokubopha itulo lokuthi ujennifer Ferguson avulele ujordaan icala lokumdlwengula.
Ukhoza ubedinwe ethelwa ngamanzi esigcawini sabezindaba asibize isigubhukane ngolwesine emahhovisi EPSL.
Uthe ujordaan uphakamise ukuba ethule inkulumo ngaphambi kokuthi ashayelwe ihlombe esephuma kwazise ubephuthuma umdlalo wekilabhu yakhe, i-orlando Pirates necape Town City.
Uqhube ngokuthi ujordaan uthe kukhona ibhomu azolidedela, akalindele amaphepha angakusasa ngesonto, kanti kuzovela ezithi usemvulele icala.
Ukulwa kukakhoza nojordaan kuzogadla kuzwele ebholeni lakuleli.
Phela IPSL iyinhlangano ephethe ukhiye wokwenza kahle kwamaqembu esizwe njengoba kuyiyona esingethe unobhutshuzwayo okhokhelayo.
Ukudungeka kobudlelwano besafa NEPSL, kuhlale kukhalwa ngokuthi bunesandla ekubhacazeni kwebafana.
Izikhulu zamakilabhu EPSL zimuzwa ekhaleni ukhoza, okungenza zimuzwe kalula nxa ezinxenxa ukuba zibe manqika ukudedelela isafa abadlali.
Zihlale zimkhetha ngo-elethu esikhundleni sikasihlalo.
Yize ukhoza ekugcizelele ukuthi kumele kulondolozwe okuhle abakuzuze nojordaan, iqiniso lithi ubesho nje ngoba ewumholi oqavile emphakathini, okungamele aphehle udlame.
Lukhulu esisazolubona kunobhutshuzwayo ngenxa yale ngxabano.
Lezi zikhulu yizona zombili ezaziyo ukuthi zibangani ngoba ingxabano yazo iqale ukucaca ukhoza engusihlalo welocal Organising Committe yendebe yomhlaba ebikuleli ngo-2010, ujordaan eyisikhulu esiphezulu.
Yize ukhoza ephika ukuthi uke waba nentshisekelo yokungenela ukhetho lokwengamela isafa, iqiniso lithi, isafa iklayeke kakhulu ngesikhathi ebanga lesi sikhundla nojordaan ngo-2009, kanti kuzogcina kuqokwe ukirsten Nematandani, obesenkanjini kajordaan.
Bahluleke ngisho ififa ibance- nga ukuba bahlehlise ukhetho ukugwema ukuthi kuphazamiseke izinhlelo zendebe yomhlaba.
Bengikhona kuyisonto ngo-2009 emhlanga, ukhoza ezonxuswa yizifunda zakwazulu-natal ukungenela ukhetho.
Yize ukhoza ethe usazokudla amathambo engqondo ngalesi sicelo, kodwa bese kusabalele ukuthi izifunda eziningi esifundazweni, bezifuna yena.
Lokhu kwenzeke evele engusihlalo wepirates njengoba ngolwesine ethe akakaze abe nentshisekelo yokuhola isafa ngoba abavunyelwe abanikazi bamakilabhu ukuhola isafa.
Ingxabano yalaba baholi isidinga abaholi abangaphezulu kwabo ngoba nxa inganqandwa, lizofa liphele ibhola lakuleli.
Namanje izinkinga zesafa kazipheli nje, zivubeleke kakhulu ngombango kakhoza nojordaan ngaphambi kokhetho lwango-2009.
Kuze kube yimanje kalukho uzinzo kule nhlangano egcine ukuba ngconywana isaholwa nguMolefi Oliphant.