KUGQASHUKA IGODA KWI-ABSA PREMIERSHIP
IZOLALA ibonene emakilabhini azama ukubalekela indawo ye-15 kwi-absa Premiership ephoqa ukubanga ukubuyela esigabeni esikhulu namakilabhu asuke esonge endaweni yesibili nakweyesithathu ngokwahlukana kwinational First Division (NFD).
Nakanjani lizoshona elangoMgqibelo ozayo sekucacile ukuthi ngubani ozoya kule midlalo yokuhlunga. I-absa Premiership iyasongwa ngomgqibelo njengoba kuzogijinywa imidlalo yokugcina yeligi. Imamelodi Sundowns isiyizingqwele ezintsha zeligi, kanti izembe seliyigencile iplatinum Stars ebambe ibhuleki emsileni we- log.
Sekubhekwe ngabomvu ukuthi ngobani abazokuya emidlalweni yokuhlunga okuyiyona ezocacisela leyo kilabhu ukuthi iyaqhubeka yini nokudlala kulesi sigaba esikhulu. Ikilabhu yokuqala esengozini yi-ajax Cape Town esendaweni yesibili uma usuka emsileni ngamaphuzu angama-31. Izobhekana nekaizer Chiefs ngomgqibelo ngo-15h00 ecape Town Stadium.
I-ajax kufanele iwunqobe noma yikanjani lo mdlalo bese imincela ukuthi isupersport United ihlulwe yibaroka FC ezobhekana nayo ngomgqibelo ngo-15h00 elucas Moripe Stadium e-atteridgeville. Isupersport isendaweni yesithathu uma usuka emsileni ngamaphuzu angu-33, bese ibaroka yona ibe sendaweni yesihlanu uma usuka emsileni ngamaphuzu angu34.
Womabili la makilabhu kusengenzeka noma yini uma engadlala ngokulingana bese i-ajax yehlula ichiefs. Isupersport idinga amaphuzu agcwele, ibaroka idinga iphuzu nje kuphela.
Nepolokwane City isengozini njengoba isendaweni yesine uma usuka emsileni ngamaphuzu angu-33. Yona izovala nechippa United ngomgqibelo ngo-15h00 epeter Mokaba Stadium, epolokwane. Ipolokwane nayo idinga amaphuzu agcwele ukuze izisindise. Nokho yona ivunwa kakhulu ngamagoli njengoba ibiwahlohlisisa.
Umuhsin Ertugral ocija i-ajax, uthi: “Ukungayi kwethu emidlalweni yokuhlunga kulele emseni wabanye abantu, isimo esikusona sinzima. Kodwa-ke kufanele sikuqinisekise ukuthi siyawunqoba lo mdlalo okunye sesiyokuzwa emuva kwawo.”
Upatrick Mabedi obambe izintambo zokuqeqesha kwichiefs, uthi: “Lo mdlalo ubuhlungu ngoba balwela ukubalekela izembe thina sifuna indawo yesithathu ukuze siye emidlalweni yecaf. Kuzokuba nzima kodwa ngeke sibe nalo uzwelo, siyela ukuyowunqoba lo mdlalo ngoba asifuni ukuthi imaritzburg United isijombe.”
Ukaitano Tembo obambe izintambo zokuqeqesha kwisupersport, uthe: “Emidlalweni yokuhlunga yilapho esingayi khona, sizozenzela thina umsebenzi kasibheke muntu.”
Udoctor “16V” Khumalo obambe esokuqeqesha kwibaroka, uthe: “Konke sengikushiyela kubadlali yibona okufanele banqu- me ukuthi iyaphela imisebenzi yabo noma kayipheli.”
Ubernard Molekwa obambe esokucija ipolokwane, uthi abayi emidlalweni yokuhlunga futhi sebeqalile ukulungiselela isizini ezayo.
Uvladislav Heric ocija ichippa, uthi naye ufuna ukuphephisa umsebenzi wakhe ngeke aze enzelele kwipolokwane.
Isiyonke imidlalo yokusonga i-absa Premiership imi kanje:NGOMGQIBELO
E-old Peter Mokaba: Polokwane City vs Chippa United 15h00.
EDR Molemela Stadium: Bloem Celtic vs Mamelodi Sundowns 15h00.
Eking Zwelithini Stadium: Amazulu FC vs Cape Town City 15h00.
E-orlando Stadium: Orlando Pirates vs Free State Stars 15h00.
Elucas Moripe Stadium: Supersport United vs Baroka FC 15h00.
Ecape Town Stadium: Ajax Cape Town vs Kaizer Chiefs 15h00.
Eroyal Bafokeng Stadium: Platinum Stars vs Bidvest Wits 15h00.
Eharry Gwala: Maritzburg United vs Golden Arrows 15h00.