Ubeselithemba lomndeni obulawe EMUT
Usengoka-7 ukufa ezinganeni zakwabo
USIZI luzwa olunye emndenini wakwakhumalo empaphala, Eshowe, osibekelwe yifu lokubulawelwa indodakazi yawo ebiyisitshudeni emangosuthu University of Technology (MUT).
Lo mndeni ubusuthembele kuyo le ndodakazi emuva kokushonelwa yizingane eziyisithupha zonke zilandelana.
ILANGA Langesonto lifike kubo kamufi, unkz Zolile Sthembele Khumalo (21), obulawe ngokudutshulwa ngumsolwa umnu Thabani Mzolo, obevele enkantolo yemantshi yasethekwini ngolwesine, kukhona unina, unkk Princess Philisiwe Khumalo, ukamakhwasa.
Ubehlaliswe ngodadewabo, unkk Khethiwe Ngema, unkk Thandi Khuzwayo nonkk Doris Ndlovu, belusizi, kunzima nokuba bakhulume ngalolu daba.
Nokho bazamile ukukhuluma nathi nakuba ibame emphinjeni indaba yokudutshulwa kwendodakazi yabo abebesalindele lukhulu kuyo.
Bebengayazeli lutho indodakazi ngezindaba zokujola njengoba bona beyiyise ukuyofunda. Bebekhuluma benikezelana babuye bakhumbuzane bobahlanu.
Bathi uzolile uzalwe mhla zingama-21 kundasa (March) ngo1997, wafunda amabanga aphansi engedlesi Primary School, waphothula ugrade 12 ezwelithini High School eshowe ngo-2017. Kumatikuletsheni waphasa ngesimboli ibachelor, wabe eseyokwenza izifundo zequantity Surveying njengoba esehlelwa yilo mshophi.
Izindaba zokwedlula kwakhe emhlabeni kuthiwa zifike ngezintatha zangolwesithathu, zilethwa ngumngani kamufi obehlala naye endlini futhi obone umufi edutshulwa ngumsolwa.
Umngani kuthiwa ushayele ucingo usenamile ongudadewabo kamufi abebelamana naye.
“Usenamile naye wehlulekile ukusazisa, wathinta abazala bakhe okuyibona abatshele onina laba esesibabalile ngenhla, kwaba yibo ababikele unkk Khumalo nomnu Comfort Khumalo, onguyise kamufi,” kuchaza omunye womama.
Kuvele ukuthi umndeni kamufi usushonelwe yizingane eziyisikhombisa ngaye. Bathi zonke izingane zabo eziyisithupha zidlule emhlabeni ngokugula - bekuqala ukuba kube khona eshona ngokulinyazwa.
“Okusiphatha kabi ukuthi iningi lazo lisuke seliqala ukufunda ezikhungweni zemfundo ephakeme bese zigula zedlule emhlabeni, ezinye zishiye izingane zisencane. Umufi yena ubengenayo ingane. Osesele nje ezinganeni nguye usenamile,” kusho abazali bakamufi.
Ubefundiswa yimali yempesheni Kuvele ukuthi umufi ubefundi- swa ngabazali ngezimali zabo zempesheni njengoba bengasebenzi sebekhulile. Bathi ngisho nezindleko zomngcwabo bazozithwalela bona phezu kwesimo ababhekene naso.
ILANGA Langesonto linxuse ukuba lizwe ilaka likanina kamufi wathi: “Konke okungehlelayo ngikubeka kunkulunkulu, ngiqiniswa wukholo lwami.”
Ngesikhathi ILANGA LangeSonto lisaya khona empaphala bekuthi uma izintatheli zibuza umuzi wakwakhumalo, bonke baphendule ngokubuza ukuthi lapho kwenzeke khona isiga, kucaca ukuthi lolu wudaba olushaqise abantu abaningi endaweni.
Bebuzwa ukuthi ngabe abakubo kamsolwa kukhona yini asebekushilo selokhu kuvele lo mshophi, balandulile.
Umufi uzofihlwa emathuneni asekhaya ngomgqibelo ziyi-12 kunhlaba (May) emini emuva kwenkonzo ezoba sesontweni ist Dennis Anglican Church ngehora le-10 ekuseni.