Ukhabonina uxazulula izinkinga zothando
Kwifix My Love
'Kumele uyibone impi isekude uma usebudlelwaneni. Ungahlali ngisho sekunzima ngoba usaba ukuthi abantu bazothini,” kusho ukhabonina Qubeka, osengumethuli wohlelo olusha lwezothando, ifix My Love, olutshengiswa KUBET (Dstv channel 129).
Uthi inkinga enkulu eyenziwa ngabantu ebudlelwaneni ngeyokuthi kungabi khona ukuvulelana izifuba ngesikhathi kuqala kuhlanganwa. Uqhuba athi kumelwe kukhulunywe umuntu azi ukuthi yini oyilindele ebudlelwaneni futhi kungani ungene kulobo budlelwano.
Le ntokazi, engumlingisi iphinde ibe ngumdansi, ithi iyaqonda ukuthi kwesinye isikhathi uma ungumuntu ongaphandle kobudlelwano kawuze waqonda ukuthi kwenzakani kobunye ubudlelwano.
“Iningi labantu osuke ubabuza ukuthi bahlaleleni ebudlelwaneni obuhlukumezayo, kuba wukuthi umuntu usaba ukuyoqala phansi, afune umuntu omusha noma athi usemazi kangcono lo ahlala naye,” kuchaza yena.
Kulolu hlelo olusha uthi into ayithokozela kakhulu wukwazi kangcono izithandani ezisuke zisohlelweni zifuna usizo.
“Ngingumuntu wothando, ngikholwa wukuthi luyinto enhle. Ngiyakujabulela ukubona abantu bejabule,” usho kanje. Ohlelweni ifix My Love, uthi abantu ubaphathele okwenzeka ngaphakathi ebudlelwaneni.
“Kwesinye isikhathi uke ubone izithandani uze uhale ko-instagram kodwa ungazi lutho ngezinto abadlula kuzo.
Kulolu hlelo yilapho sizobona khona ubunzima bothando, abantu beba nezingxoxo ngothando lwabo nezisombululo. Ngikholwa wukuthi kuzona zonke izinto ezikhona isisombululo sihlezi sikhona. Kwesinye isikhathi isisombululo kuba wukuthi nihlukane ngoba kani-dalelwene,” kuchaza yena.
Ukhabonina kwayena usothandweni njengoba ekulolu hlelo. Uthi isithandwa sakhe sihlala e-asia.
“Ngike ngaba sothandweni kodwa kangikaze ngithole umuntu engixhumana naye ngokomoya ngale ndlela. Umuntu engikwazi ukuba sizihlalele naye etshanini ebusuku sizixoxele ngempilo nje. Ngizizwa ngibusisekile yize ikhona ingqinamba yokuthi siqhelelene kodwa-ke nalokho kuyisibusiso ngoba kuyasiphoqa ukuba isikhathi sethu sisisebenzise kahle,” kusho yena ezwakala ukuthi ukitazeka kwamancane uma ekhuluma ngesithandwa sakhe.
Kulolu hlelo usebenza ngokubambisana ne- clinical psychologist, udkt Khosi Jiyane, kanti lutshengiswa njalo ngolwesithathu ngo-9:30 kusihlwa.