UMUNYU KUFIHLWA U-AKHUMZI JEZILE
INKONZO yomngcwabo ka-akhumzi Jezile ebiserhema Bible Church egoli ikukhombise ngokusobala ukuthi ubengumuntu onogazi kubantu.
Osaziwayo bebephume ngobuningi babo beyothi ndlelanhle kuleli qhawe elizakhele igama liselincane ngokweminyaka emkhakheni wezikaqedisizungu. Iningi lehluleke ngisho wukubamba izinyembezi ngenxa yomunyu.
U-andile Ncube uvele wahlengezela izinyembezi efunda incwadi ebibhalwe nguzoleka ongunina kaAkhumzi. “Ngikukhalelile mntanami. Ngakhala kujehova ngibuza ukuthi kungani lokhu kwenzeka kumina, kungani kwenzeke kuwena. Isililo sikamama kujehova. Kodwa ngaphinde ngaziphendula futhi. Ukube bekungenzeki kumina, yimuphi omunye umzali obekumele adlule kulobu buhlungu? Ukulahlekelwa nguwe kungilethele olukhulu usizi nobuhlungu,” kusho incwadi.
Umngani omkhulu ka-akhumzi, udkt Musa Mthombeni uhlulekile wukubamba izinyembezi ekhumbula usuku athola ngalo ukuthi akasekho emhlabeni umngani wakhe.
“Ngesonto eledlule ngathola ucingo olwashintsha impilo yami. Kusukela ngaleso sikhathi ngizithole ngiwumuntu odunguzayo nophithanelwe yikhanda. Ngikuthola kunzima ukukholwa wukuthi konke lokhu kuyenzeka. Ngiphithaniswe yikho konke okwenzekayo,” kusho yena.
Owomndeni wakubo kwa-akhumzi, umnu Folagi Jezile uchazele abebehambele lo mngcwabo ngokushona kwendodana yabo.
“Mhlaka-28 ku-april sasimatasa silungiselela omunye umngcwabo. Sazithola sesibizelwa eceleni njengamadoda satshelwa ngokushona kuka-akhumzi. Ngithe mangitshelwa ngokushona kwakhe ngahluleka nawukuma. Angikaze ngicabange ukuthi uzoshona esemncane kangaka, ngangithi nguye oyongcwaba mina....kodwa-ke uthixo.”
U-akhumzi ushone engozini yemoto nabalingisi uthobani Mseleni nosiyasanga Kobese owake wacula kwijoyous Celebration nabanye. Ubekwe endaweni yakhe yokugcina emathuneni asewestpark, egoli.