I-SUNDOWNS IKHALA IYAZITHULISA NGO-BILLIAT
Ibalisa ngembobo ezovuleka esikimini sayo secaf
UKHAMA Billiat uzohamba nesikhala esimqoka sophawini wabadlali bemamelodi Sundowns kwicaf Champions League njengoba sezimphelela izinsuku kule kilabhu esiqale isigaba samaqoqo salo mqhudelwano omkhulukazi e-afrika.
Idowns isiyiqalile imidlalo yamaqoqo yecaf njengoba izolo ngomgqibelo ebusuku ibibhekene newydad Casablanca yasemorocco emdlalweni ka-group C elucas Moripe Stadium, e-atteridgeville.
Idowns izolahlekelwa yisikhala njengoba ubilliat odlala esiswini engeke ayiqede le midlalo njengoba enqaba ukwelula inkontileka nayo. Ukhonjwa e-europe.
Imidlalo yecaf izoqhubeka kuze kube ngulwezi (November) njengoba owamanqamu ungayo le nyanga. Inkontileka kabilliat izokube iphele mhla zingama-30 kunhlangulana (June) nedowns okusho ukuthi uzokube engasesiyena umdlali wayo (idowns).
Ngontulikazi (July) izokube isaqhubeka imidlalo yamaqoqo kanti ubilliat uzokube engasabonwa.
Uthulani “TT” Thuswa wezokuxhumana kwidowns, uthi ibashayile indaba kabilliat.
“Njengoba ehamba nje uhamba naso isikhala secaf futhi ayikho nendlela yokusivala ngoba icaf inemithetho yayo nezikhathi okubhaliswa ngazo abadlali. Besimudinga kodwa kayikho into esingayenza ngoba usenqumile ngekusasa lakhe. Nokho-ke impilo kufanele iqhubeke. Nginesiqiniseko sokuthi kubadlali esinabo bazosibeka lapho sibheke khona okuwukunqoba le nkomishi okwesibili,” kusho uthuswa.