I-APP ENTSHA YEZOBUMNANDI
BAZOBUTHOLA sebusongwe ndawonye ubumnandi obenzeka ezindaweni ezahlukene kwi-app entsha efolose ngesibabuli esingumsakazi wey FM ukhutso Theledi.
Le App ebizwa nge-we Party izosakaza ezobumnandi ezenzeka bukhoma ezindaweni zenjabulo ezweni lonke ukuze abathandi bobumnandi bazikhethele ukuthi bazoshona ngaphi.
Ngale kokuveza izinto ezenzeka ezindaweni zenjabulo, le App izophinde isakaze izingxoxo nabaculi kanye nokwethulwa kwemisebenzi yabo bukhoma njengakwithelevishini uqobo.
Nalaba abahlela amafestivali bazobe bekhonjiswa bukhoma kusukela besawahlela kuze kube sekugcineni.
Umnu Itumeleng Mohlahlo ongumsunguli wale-app okulindeleke ithokozelwe kakhulu yintsha uthi inhloso wukuthi ukwazi ukubona okwenzekayo ngaphambi kokuba uze uphume nasendlini.
“Ungayifanisa le App nenqolobane yezwelonke yenjabulo. Sinezivumelwano nezinkampani zokuqopha umculo ukuze kuvele imisebenzi yabaculi kusukela besapheka, kuze kube yisikhathi lapho sekwethulweni khona umsebenzi noma sebecula ezinda-weni ezahlukene.
"Sinezivumelwano futhi nezindawo ezidumile zokujabulisa abantu okungama-club, amalounge noshisanyama ezisezingeni eliphezulu ezingama-320.
Ukhutso uzobe esengena ophikweni lwale App oluyithelevishini njalo ngomsombuluko nalapho ezobe egoqa obekwenzeka ngempelasonto, esitshela nangokuzokwenzeka kulelo sonto eliqalayo.
Nakanjani iyaqala ukusebenza ekuqaleni kukanhlangulana (June) kodwa konke sekumi ngomumo,” kusho umohlahlo.
Ukhutso ugqame ngokwethula uhlelo lwasemini yasekuseni (09h00-12h00) kwiy FM olubizwa ngekrunch Till Lunch, aphinde abe ngumethuli wezinhlelo zethelevishini.