Maziqine izigwebo kwababulala abesifazane
UKUHLUKUNYEZWA nokubulawa kwabesifazane yilabo abanobudlelwane nabo kubukeka sekufike kwelinye izinga kuleli.
Lokhu kwenzeka phezu kwemizamo yamaqembu ezombusazwe nezinhlaka zikahulumeni yokuthuthukisa abesifazane, bafakwe ezikhundleni eziphezulu emazingeni kahulumeni nasezinkampanini ezizimele.
Kuleli sonto nje kube nezigameko ezimbili ezenzekile, eziqhakambise ukuthi phezu kwemizamo yokwenza ngcono isimo sabesimame, kodwa usemkhulu umsebenzi osele wokufundisa abesilisa ukuthi abesifazane kabayona impahla yabo (abesilisa), abangenza noma yini ngayo.
Egoli ijaji lenkantolo enkulu ligwebe usandile Mantsoe ngecala lokubulala isithandwa sakhe, ukarabo Mokoena (22), waqeda lapho washisa isidumbu sakhe ngoba ezama ukushabalalisa ubufakazi.
Le nsizwa esencane igwetshwe iminyaka engu-32 ibhadla ejele. Yenza leli cala nje, ibikade iphila impilo ephezulu, ihlala endaweni yomntakabani, esandton, egoli.
Kanti la Kwazulu-natal, umfundi wasemangosuthu University of Technology, unkz Zolile Khumalo, 21, kusolwa ukuthi udutshulwe wabulawa ngowayeyisoka lakhe ngolwesibili ehositela elihlala abafundi bale nyuvesi elisenkabeni yetheku.
Kuthiwa umsolwa wenze lokhu ngoba egajwe yisikhwele, ecasulwe wukuthi unkz Khumalo umtshele ukuthi ucu kalusahlangani entanyeni.
Ngokwemithombo yaleli phephandaba, umsolwa oneminyaka engu-23, ubeseziphothulile izifundo zakhe kuyona le nyuvesi, esezoqala ukusebenza azimele, kuyo le nyanga.
Okwenzekile yinhlekelele emindenini emibili. Okankz Khumalo sinesiqiniseko sokuthi ubunezifiso ezinhle ngendodakazi yawo, nokamsolwa nawo obusuthembe ukuthi uzoba nekusasa eliqhakazile.
Kuyadabukisa ukuthi zombili lezi zehlakalo zithinta abantu abasebasha, abebebukeka benekusasa eliqhakazile.
Umbuzo ovelayo uthi, kudalwa yini ukuba enye intsha yakithi iqome ukubulala ngesihluku labo esuke ithi iyabathanda uma izinto sezingahambi kahle?
Lo mbuzo kawunayo impendulo elula. Ngokubona kwethu, abazali kufanele badlale indima yabo yokuba ngabazali, beluleke izingane zabo ngendlela yokuziphatha kanye nezinto ezibalulekile empilweni - hhayi ukujaha izindaba zokuthandana - okungaba yimfundo nokuzakhela igama elihle emsebenzini ngokusebenza ngokuzimisela.
Kungakuhle futhi ukuthi ziqiniswe izigwebo kulabo abahlukumeza noma babulale abesimame ukuze labo abatholwa benamacala okwenza okubi, bezoba yisibonelo kwabanye.