USENGENE EMCULWENI "U-SLAY QUEEN"
USENGENE emculweni ozakhele udumo ezinkundleni zokuxhumana usbongiseni Mbele owaziwa ngelikabobo kodwa abaningi asebembiza ngo-slay Queen. Uslay Queen usezakhele igama ezinkundleni zokuxhumana ngenxa yama- video akhe asabalele kulezi nkundla, avela kuwona ezibiza nge-slay Queen. Leli gama lisetshenziswa uma kubizwa abesifazane abasebancane kodwa abathanda ukuba “sezintweni”. Le nsizwa efunda esikoleni sabathatha kancane engqondweni isingene emculweni njengoba isiqalile ukubonakala ezindaweni zobumnandi.
Unkululeko Sokhela odume ngelikamafutha futhi ongumnikazi wenkampani I-OYS Entertainment ngokubambisana nongcebo Luhlongwana okuyiyona eqopha ubobo uthi idumela lakhe ezinkundleni zokuxhumana yilona elenze bathatha isinqumo sokumfaka e-studio.
“Sibonile ukuthi abantu bayamthanda futhi naye uyakwazi uku- jabulisa abantu. Yingakho sikhethe ukuba simqophe,” kusho umafutha.
Uthi ubobo useqalile ukucula ingoma yakhe ezindaweni zobumnandi ezakhelene nondengezi.
Ubobo ngowakulona leli lokishi kanti ngokusho kukamafutha usedume njengesinkwa.
“Kuningi esimhlelele khona ngengoma yakhe njengoba nabantu uma eyicula bekhombisa ukuyithanda. Sihlela ukuba siyifake emsakazweni futhi aqashwe nasezindaweni ezahlukene ajabulise abantu,” eqhuba.
Umafutha uthe bayajabula ukuthi nomndeni wakhe uyabeseka ngesinqumo sokufaka ubobo emculweni. Inkundla yokuxhumana isiphenduke indlela yokufaka osaziwayo abehlukene emkhakheni wezikaqedisizungu. Kuzokhumbuleka ukuthi osaziwayo okubalwa kubo, umlindo The Vocalist, Zodwa Wabantu, Kim The Artist bangabanye abaqale ukuduma ezinkundleni zokuxhumana.
lucky.cain@ilanganews.co.za