Bekugqame ubumbano kwi- Travel Indaba
Kuyajabulisa ukwanda kwabamnyama
USUFIKE wadlula umbukiso omkhulukazi wezokuvakasha oba sethekwini obizwa ngeAfrica Travel Indaba, ohlanganisa izinkumbi zabantu abakulo mkhakha abaqhamuka emazweni ahlukene.
Ezinkumbini ezisuke zihlangene kulo mbukiso owenziwa minyaka yonke kubalwa izikhulu eziphethe embonini yezokuvakasha emazweni ahlukene, abamahhotela, abahlelela izivakashi amahholidi, abathutha izivakashi, nabasebenza ukudayisa nokuqhakambisa izindawo eziheha izivakashi emazweni ahlukene.
Lo mbukiso osekuneminyaka uba senkosi Albert Luthuli International Convention Centre, ethekwini, nasedurban Exhibition Centre, ubalwa neminye emikhulukazi eyenzeka emhlabeni jikelele.
KUGQAME UBUMBANO
Embukisweni wanonyaka ngihlabeke umxhwele ngendlela okugqame ngayo ubumbano ezinhlangeni ezahlukene. Kusemqoka ukuba abantu babumbane ikakhulukazi uma bekhuluma ulimi olulodwa okuwulimi lokuthuthukisa ezokuvakasha.
Kube kuhle ukubona izinhlanga ezahlukene zigqoke amaduku nobekungathi kuhambisana nokuhlonipha unkk Winnie Madikizela-mandela osanda kudlula emhlabeni. Isitayela samaduku siqale ukugqama ngesikhathi kuqala imibhikisho yemfundo yamahhala kuleli obuwaziwa ngele(#FEESMUSTFALL). Lesi sitayela siphinde sagqama futhi muva nje ngesikhathi kudlule emhlabeni unkk
Madikizila
Mandela obebizwa ngomama
Wesizwe.
Ngokwesintu iduku liyindlela yokukhombisa ukuhlonipha, ikakhulukazi kumuntu wesifazane, futhi liyaba yindlela yokuhloba nesitayela.
BAYANDA ABAMNYAMA KWEZOKUVAKASHA
Kuyiqiniso elingephikwe ukuthi umkhakha wezokuvakasha usingethwe kakhulu ngabamhlophe, kodwa kulo nyaka kube kuhle ukubona sanda isibalo sabampisholo nezinhlelo ezikhombisa ukubeseka ngesikhathi kuqhubeka lo mbukiso.
Uhlaka lwezokuvakasha Kwazulu-natal, itourism KZN, lusaqhubeka nezinhlelo zokuthuthukisa izinhlelo zokuvakasha kwasezindaweni zasemakhaya. Umkhakha wezokuvakasha ubalwa neminye ehamba phambili ekuthuthukiseni umnotho waseningizimu Afrika nowamanye amazwe.
Iningi labantu uma licabanga ezokuvakasha liyajula ngemiqondo licabange imelika, ithailand, idubai namanye agqamile kwezokuvakasha. Engikuqaphelile ngohlelo lwetourism KZN wukuthi umphakathi ungazithuthukisa ngomlando wezindawo ozakhele ongaheha izivakashi.
Ngolwesine ngibikile ngohlelo logu Tourism oselungenise ezindaweni zasemakhaya, okuhloswe ngalo ukuzwisa izivakashi impilo ephilwa yimiphakathi eyahlukene. Nomndeni wakwaMseleku wodumo lohlelo lukamabonakude, Uthando Nesithembu, nawo usuheha izivakashi ngenxa yodumo lwawo. Lokhu kukhomba ngokusobala ukuthi ngesinye isikhathi izivakashi azihehwa wubukhazikhazi bamahhotela aphambili, kodwa zithokozela ukufunda nokubona ukuthi abanye abantu baphila kanjani.
Phambilini enye yama-tour Guide, unkz Thokozile Jili, uzwakalise okukhulu ukukhathazeka ngokuthi iningi labantu eningizimu Afrika alazi lutho ngomlando wezindawo elizalelwe lakhulela kuzona. Kunalokho kuze kuqhamuke abezizwe bafunde ngomlando wezindawo ezikhona kuleli bese benza enkulu imali ngalowo mlando.
“Okudumazayo wukuthi kokunye lo mlando ngezindawo zethuubuye uhlanekezelwe ngenhloso yokufeza izinhloso ezithile nokwenza abathile babukeke kahle,” esho engxoxweni ekhethekile abenayo naleli
phephandaba phambilini. Uqhube ngokuthi izindawo eziningi zokuvakasha ezikhuluma ngomlando wakwazulu, zisingethwe ngabelungu. “Yibona abenza inzuzo ngokungokwethu,” esho. Emhlanganweni wosomabhizinisi abasafufusa kwezokuvakasha obuhlelwe yitourism KZN, obuyingxenye yayo i-africa Travel Indaba, ebisemaharani Hotel, enorth Beach, ethekwini, umnu Sisa Ntshona oyisikhulu esiphezulu kwitourism South Africa, ukhuthaze osomabhizinisi ukuba benze izinto ngendlela ehlukile.
“Kulo mkhakha udla ngokuhluka kwakho. Ubani
owathi ibhulakufesi kumele liphele seligamenxe eleshumi ekuseni?” kubuza umnu Ntshona kosomabhizinisi abasazimisele ukuthuthuka kulo mkhakha. “Akumele nakancane uzenyeze noma ubukele phansi indawo yakho. Uyazi ukuthi ebrazil kunendawo ethandwa kakhulu yizivakashi.
"Le ndawo igcwele imijondolo kanti iningi lezivakashi lisuke lifuna ukuyozibonela libe yingxenye yempilo yasemjondolo. Thina sinamahloni, sifihla okwethu sifune ukuqhakambisa okwabanye bese kuba khona lapho sishoda khona. Uma senza okungokwethu akekho ozosahlulela ngokuthi siyashoda ngoba yithina esikwazi kangcono kunabanye,” kusho yena. Ubagqugquzele nangokuthi kumele bakhuthalele nokufunda ezinye izilimi zakwamanye amazwe ngoba lokho kwenza ukuxhumana kube lula.
ISIMEMEZELO ESIJABULISAYO
Umbukiso wakulo nyaka uvulwe ngesimemezelo esijabulise abaningi abasemkhakheni wamabhizinisi nezikhulu zikahulumeni wakwazulu-natal nomasipala wetheku. Kubikwe ukuthi kusukela ngo-okthoba nonyaka sekuzoba nendiza esuka ngqo eheathrow International Airport, elondon, engilandi izothi cababa eking Shaka International Airport ethekwini, lihamba kathathu libuye kathathu ngesonto.
Lesi simemezelo sishayelwe ihlombe kwazise iningi lezivakashi eziza kuleli dolobha zisuke ziqhamuka khona engilandi futhi kuzoqinisa namaxhama ezobudlelwano phakathi kwalesi sifundazwe naleliya lizwe.
Kuyona le ngqungquthela kuphinde kwakhunjulwa obengumengameli wokuqala wentando yeningi eningizimu Afrika, umnu Nelson Mandela.
Leli qhawe lomzabalazo likhunjulwe ngomdlalo weshashalazi obuhambisana nomculo okhiqizwe wadidiyelwa ngujames Ngcobo osezakhele igama kwezeshashalazi nakumabonakude.
Abaculi abebehamba phambili ngubrian Temba nowanda Baloyi.
Kuningi abantu abangakufunda ngomkhakha wezokuvakasha uma bezinika isikhathi.