I-IRON DUKE IPHUMELA OBALA NGO-MATO
I-iron Duke ixwayisa isikhulu sosuthu
USIHLALO wepremier Soccer League (PSL) u-irvin “Iron Duke” Khoza ( okwesokudla) uphumela obala ngesikhundla esimqoka kule nhlangano esibanjwe okwesikhashana ngumato Madlala ( okwebunxele) sokuba yisikhulu esiphezulu.
Umato obuye abe ngusihlalo welamontville Golden Arrows, uqokwe ukubamba okwesikhashana isikhundla sokuba yisikhulu esiphezulu kwipsl ngolwezi (November 2015) emuva kokuba kushiye ubrand de Villiers.
Bekubhekwe ukuba abambe isikhashana kodwa sekuphele iminyaka emibili nesigamu eqhoqhobele lesi sikhundla osekwenze kwaba nezinkonondo kubathandi bebhola nakwabanye abanikazi bamakilabhu kodwa okuthiwa bakhulumela emakhoneni.
Ujohn Comitis ongusihlalo wecape Town City, ekhuluma ohlelweni lukarobert Marawa kwimetro FM ngolwesine kusihlwa, uzwakale ehambisana nomlaleli okhale ngokuhlala isikhathi eside kukamato, ethi kuphambene nomthetho.
Engxoxweni ukhoza abe nayo NELANGA Langesonto ngolwesihlanu ekuseni, uphumele obala ngesikhundla sikamato.
“Into ebuhlungu nengicasulayo wukuthi emihlanganweni emikhulu YEPSL lapho amakilabhu esuke emelwe wonke, akukho noyedwa owake wathi akeneme ngokusebenza kukamato kumbe ukuhlala kwakhe isikhathi eside. Emhlanganweni ebesinawo yimina ophakamise ukuba ibhekisiswe indaba yalesi sikhundla ngoba umato usehlale isikhathi eside, cishe ngikusho kathathu lokho.
“Umato cishe unobuchule ukwedlula abantu abaningi abazitshela ukuthi usebholeni kungafanele. Ngolwazi lwakhe olunzulu lwezimali usengenise eningi imali eligini.
"Empeleni kuzona zonke izikhulu eziphezulu esesike saba nazo nguyena osenze umsebenzi oncomekayo, ude Villiers ubengconywana naye.
“Abantu mabayeke ukuzenza izihlakaniphi bebe bengakhaliphile futhi bengazi lutho. Indaba yalesi sikhundla imqoka kabi. Kunabantu esike sabahlola kwinhlolokhono, yikhona nje ukuthi kuthatha isikhathi, akusona isikhundla esincane lesi, simqoka kabi.
“Akekho othe umato uzohlala unomphelo, ubambile, abantu mabakuqonde lokho ukuthi uyibamba kuze kube sithola umuntu esi- bona ukuthi simfanele lesi sikhundla,” kusho ukhoza.
Limbuza leli phephandaba ukuthi uthini ngala makilabhu athunaza isithunzi SEPSL ngokungaholeli abadlali, uthe:
“Akusikho ngoba ngihambisana nakho, inkinga wukuthi abantu kabazazi izingqinamba ezibhekene nabanikazi bamakilabhu. Leli yibhizinisi elinzima kabi, kufanele ungene kulona ngothando ngoba liyaqothulana ephaketheni.
"Abantu abadla kahle ngamaagent ngoba agaya imali eningi ekubeni ehleli nje wona.
“Uwabona mhla ezosayinisa umdlali kodwa uma lowo mdlali elimele yikilabhu ebhekana nezindleko wona asuke engasabonwa. Bheka njengamanje, iphi i- agent kasenzo Meyiwa? Yashonaphi? Wake wayizwa iphawula ithini nje yona selokhu adlula emhlabeni?”
Ngodaba lwamazulu okuvela ukuthi asafundisisa isinqumo sejaji udenise Fisher sokuchitha udaba lwawo lokungena kwimtn8 bese eluphonsela inselelo, uthe:
“Ngiyawuthanda umfutho kalunga Sokhela kodwa ziningi izinto okusafanele azifunde ngebhola.
"Uma unenkinga nomuntu ungahambe umemezela, thula ungabangi umsindo.
Ngiyakuhlonipha konke akwenzayo kodwa akangahambi ememezela, yena akenze izwe libone ukuthi IPSL yenze iphutha uma ebona kanjalo, akwenze lokho ethule angabangi umsindo ngoba kawusizi.”