ISUSWE YISIPHUZO EYESALUKAZI ESIBHAXWE NGENDUKU
UBABABAZA isihluku owesifazane wasematshamhlophe, emdletsheni, ehluhluwe, okusabalale i- video yakhe ezinkundleni zokuxhumana ebhaxabulwa yintombazane (19) efunda isikole, imsola ngokuyibiza ngesifebe. Unkz Cabangile Ngcobo (69) ( osesithombeni), elandisa ILA
NGA Langesonto ngesikhathi limvakashele kwakhe emuva kokwehlelwa yilo mshophi, uthi le ngane emshaye waze wakhwehlela igazi iyisihlobo sakhe.
Echaza uthi indaba isuswe yisiphuzo abesithengile, okuthe esakhuluma nomakhelwane wakhe esibeke phansi kwaqhamuka le ntombazane ewumsolwa, umbali Buthelezi, ihamba nabangani bayo bathatha isiphuzo babaleka naso baya esikoleni.
“Ngimemezile ngithi mabashiye isiphuzo sami, kwanhlanga zimuka nomoya.
"Ngizamile ukubajaha kwaze kwaqhamuka abanye abafana bathi ‘gogo bayeke uyoze uwe phansi ngoba laba bantu bagijima impela futhi kabami’.
"Ngibuyele ekhaya ngabalinda ukuthi babuye esikoleni ngoba vele indlela idlula kwami, ngaphindela kubona.
"Ekufikeni kwami abanye bakhombise izimpawu zokubaleka kodwa lo wagoloza. Ngibe sengithi ngiyotshela abazali bakhe ngalokhu kanti ngizohlangana naye esebuya ekhaya, efake induku ebhakedeni lamanzi.
"Sithe uma sihlangana wangabe esabuza lutho, wanginenebula, kwale noma sengimbiza ngegama ngithi Mbali ngenzeni, wayithela engiqoba ingalo. Ngisizwe ukuvika ngabe ngibomvu ikhanda.
"Ngemuva kokuba engishayile ngibe sengiyobika enduneni,” kulanda unkz Ngcobo.
Uthi esalubika udaba lokushaywa kwakhe enduneni, kumemfuke umsolwa esaphethe induku abemshaya ngayo.
“Ufike wangayibingelela nenduna wavele waguqa ngedolo wahloma induku phambi kwakhe, wayibeka esilevini.
Ngiyasola ukuthi ubefuna ukuzwa ukuthi induna izothini ngaye ebese ephinda engishaya phambi kwayo. Induna ithe asiyoxoxisana nonina ngoba siyizihlobo, ngenza kanjalo.
"Unina uthe ngithinte abangathintwa, umbali uyaziwa ukuthi unolaka, esho phambi kwakhe,” kusho unkz Ngcobo.
Unkz Ngcobo, emuva kokungalutholi usizo ubuyele enduneni nalapho induna iphinde yeluleka ngokuthi akakhulume nogogo kambali okunguye obone umonakalo.
ILANGA Langesonto likhuluma nenduna yamacala esizweni sasemdletsheni, umnu Jabulani Mdletshe, ivumile ukuthi udaba lufikile kuyona, lulethwa nguNkz Ngcobo, yabe isimyalela ukuthi abaxoxisane ngoba ubengavuli icala kodwa ubebika nje.
“Ngokuzwa kwami bavumelane ngokuthi intombazane izohlawula ngembuzi igeze umaNgcobo, nomfowabo wentombazana ubesevumile ukuthi uzoyithenga imbuzi.
"Ngemuva kokusabalala kwale video sesiyekele kwabomthetho kodwa nathi kukhona esizokwenza, okuthinta obeshutha le video ehlaze isizwe,” kusho umnu Mdletshe.
Ngesikhathi ILANGA LangeSonto litheleka kubo kankz Buthelezi lifike engena nje ekhaya ngemuva kokulala ezitokisini ngaleli cala, kodwa wadedelwa ngemuva kokunikwa ibheyili yamahhala.
Unkz Busangani Buthelezi ongunina kankz Buthelezi wale waphetha ukukhuluma ngalolu daba njengoba ethe ngeke akwazi ukukhuluma, maqede wakhiya umuzi waphuma ngesango elandelwa yiwo wonke amalungu omndeni, beshiya izintatheli zimile egcekeni.
Okhulumela amaphoyisa Kwazulu-natal Colonel Thulani Zwane uthe unkz Buthelezi uvelile enkantolo ngolwesine wathola ibheyili yamahhala. Icala lihlehlele umhlaka-18 kumandulo (September).