Usolwa ngekhanda eliqinile usolinas
Akayingeni eyabadlali abasha
USOLWA ngokuba ngukhanda limtshelokwakhe umqeqeshi wekaizer Chiefs njengoba kuvela ukuthi akayingeni eyabadlali abasha ufuna ukuqhubeka nalabo aqale nabo isizini.
Ichiefs izobhekana nesuperSport United kwi- semi final YEMTN8 namuhla ngesonto ngo15h00 elucas Moripe Stadium, etshwane.
Ichiefs iya kulo mdlalo nje, isanda kujabulisa abalandeli bayo isayinisa abadlali ababili abanesipiliyoni.
Isayinise ulebohang Manyama odlala esiswini nomario Booysen odlala emuva.
Kuthiwa izikhulu zechiefs bezitatazela zifuna incwadi kamanyama emkhululayo kule kilabhu yaseturkey abedlala kuyona ngenhloso yokuthi adlale namuhla.
Kuthiwa izikhulu zithe zingafika nazo zonke izimfanelo namakhadi alaba badlali ugiovanni Solinas wathi abame kancane ngeke nje ababophele kulo mdlalo.
Kuthiwa izikhulu ziphume ziquvile zimsola ngokuqinisa ikhanda.
Lo mqeqeshi esithangamini nabezindaba ukuqinisekisile ukuthi ngeke ababophele laba badlali, uzoqhubeka nalaba aqale nabo.
“Ngabe ngifuna ukuxova iqembu lami uma ngingase ngibabo- phele kulo mdlalo. Kusafanele baqale bajime ngibabone ngoba kangibazi kahle ngibagcine kudala.
"Cishe indaba yabo ngizoze ngiyibone emdlalweni olandela lona WEMTN8,” kusho usolinas.
Uqhube ngokuthi ezakhe zimi ngomumo ziwulindele lo mdlalo.
“Konke kuhambe ngokohlelo, namaphutha ebesinawo sizamile ukuwalungisa.
"Lo mdlalo ngeke uze ube lula neze kodwa-ke ingcindezi iyasiphoqa ukuthi siwunqobe.
"Ngeke sikwazi ukuphuma kulo mqhudelwano. Kufanele siwunqobe noma kanjani.
"Yiwona mdlalo lona okufanele sikhombise ngawo ukuthi sihlose ukubuyisa izinsuku zenjabulo eqenjini,” kusho usolinas.
Ukaitano Tembo ololonga isupersport uthi ubhekene nenkulu ingcindezi njengoba ezakhe ziya kulo mdlalo.
“Ngumdlalo onzima lona kodwa ingcindezi enginayo ngeyokuthi bonke abaqeqeshi engisebenze nabo banqobe okuthile ngesizini yabo yokuqala.
"Nami ngifuna ukuzibeka kulowo mlando kodwa kubukeka kunzima njengoba siqhathwe nekilabhu nayo ebhekene nengcindezi yokunqoba.
"Kodwa siwuhlomele lo mdlalo, noma kanjani sizozama ukuwunqoba,” kusho utembo.