EZEMISAKAZO:
NGESONTO eledlule ngike ngafunda ngemibono yabalaleli bekhwela bedilika kuSbu Buthelezi wokhozi FM egxekwa ngokungabambisani nabalaleli, kuthiwa ubavala besakhuluma.
Kungimangazile lokhu ngoba ngiyazi sekuyiminyaka eyibambile emsakazweni, okusho ukuthi isipiliyoni sesisiningi ngokwanele.
Kufanele engabe usekuqonda kahle futhi usenendlela ekahle yokubhekana nesimo lapho ezwa umlaleli ephuma kulayini noma ezwa sengathi kabanaphuzu kokukhulunywa ngakho.
Yinto eyaziwayo ukuthi abanye abalaleli babuye baphume eceleni njengojosaka, ikakhulukazi uma kunesihloko esibekiwe.
Kangikwazanga ukuphawula ngalokhu nakozakwethu esixoxa nabo ngale mboni ngoba bengingakaze ngizinike ithuba lokumlalela aze aqede uhlelo alwenza ngokubambisana nomroza Buthelezi naye osenomude umlando.
Ngenhlanhla noma ngeshwa ngesonto eledlule ngizigudlela ngibheke le kwelakithi ngizithole ngiphoqeleka ukulalela lolu hlelo. Lokhu bekwenziwa yinto esike sayiphawula kuyo le mboni yokuthi Kwazulu- Natal kunezindawo eziningi lapho ungayitholi khona eminye imisakazo kodwa kuzwakala ukhozi FM kuphela.
Kule ndlela yami ebheke enkandla kunezindawo eziningi ebezingena lona kuphela ukhozi FM, nokugcine kuphoqa ukuba ngingabe ngisasithinta isiteshi.
Ngenhlanhla futhi bekuzoba nesigaba lapho bezoxoxa khona nomama ukhawula wodumo ephalamende. Ngokohlelo, lesi sigatshana bekungesokuthola ukuthi ungumuntu onjani ngale kwalokhu esimazi eyikho uma simbona emele iqembu lakhe i-economic Freedom Fighters (EFF).
Ngidumalile ngendlela usbu abezwakala enqamula ngayo imibuzo eqhamuke ngakuzakwabo, ngase ngikhumbula incwadi yomfundi. Lesi senzo size sabatshazwa nawumuntu ebengihamba naye emotweni ongahlanganise lutho nezokusakaza.
Usbu ngiyamazi esenza uhlelo lwangesonto eselwenziwa ngusiya Mhlongo. Bengize ngihluleke wukuzibamba ngezinye izikhathi, ngimncome nje ngqo. Ngibona sengathi yilona abengcono kulo kunalokhu engikuzwile sengizinika isikhathi sokumlalela emini