Izinsimbi, imisindo nephimbo makuhambisane nohlobo lomculo SIVULA AMEHLO ABACULI:
ABACULI nabo bonke abasendimeni yomculo kumele bafunde ukuthi uma beqopha bayazazi izinsimbi nemisindo emesha uhlobo lomculo abaluculayo, ngisho iphimbo imbala, bangasebenzisi izinsimbi okungeyizo ephinjeni elingafanele. Baningi abathi bangezwa imisindo ethile emnandi kolunye uhlobo lomculo bacabange ukuthi uma besebenzisa lezo zinsimbi, bacule ezinye izinhlobo kuzoba mnandi bese kuvele kube ngamanzi nophalafini.
Njengoba sivula amehlo abaculi siyaqaphela ukuthi abaculi abaningi abaphiwe konke. Kukhona umuntu onesiphiwo sokuhlanganisa imisindo ( melody mixer), owaziyo ukuthi uma kuhlangana isigingci ne-organi kuzophumani, kuzomesha yini noma cha.
Baningi esiye sibezwe ukuthi baphiwe ukucula kuphela bese becela abadlali bezinsimbi ukuba babadlalele, uthole ukuthi umdlali wezinsimbi unesandla sombhaqanga, ngisho u- lead guitar wakhona uvele uphuma ekubeni yi- gospel esuke iculwa.
Kuhle abaculi bathole ochwepheshe bemisindo, bakhona futhi labo abakwazi ukudlala izinsimbi kodwa bakhiphe imisindo ngemilomo betshela umdlali.
Umculi okwazi ukuthaka imisindo wenza ube lula umsebenzi womdlali wezinsimbi ngoba ukwazi ngisho ukumtshela ukuthi akayiqale kanjani ingoma yakhe nokuthi ayiphethe kanjani.
Esikhathini esiningi abantu abangabaqambi bezingoma bathi besayiqamba nje ingo- ma, ifika ekhanda ibe ihamba nemisindo yayo, uze ubone umuntu edansa yedwa uma uhlala naye endlini, uze ucabange ukuthi usephambene ekhanda ngoba ulingisa zonke izindlela nemisindo ekhanda iculo lakhe.
Imvamisa umuntu onephimbo lomculo wengcwenga ( classic) uye aphelezelwe yipiyano, atshiloze kamnandi. Nalabo abavamise ukucula amasolo uma usuxhobela izinsimbi zonke usuke usuwuqeda nya umsoco wephimbo lakhe.
Laba abacula ngamaphimbo kuphela njengesicathamiya esisezingeni eliphezulu seqembu iladysmith Black Mambazo, amaphimbo abo aphenduka izinsimbi uqobo. Isigqi nakho konke kusuke kulapho.
Asibakhumbuze abaculi nabadlali bezinsimbi ukuthi ingoma yisitshulu somphakathi, kumele uma sithakwa kuphume into enephunga elimnandi eheha umuntu ehamba laphaya.
Uma silalele amacd abantu lapha siye sizwe ukudlala okukodwa okufanayo, kuhluke izihloko zezingoma nezinhlamvu kodwa izinsimbi uzwe ukuthi ngezengoma yomuntu osewake wayizwa. Ngisho emculweni kamasikandi wale mihla sebevele bathathe izinsimbi zomculi othile njengoba zinjalo.
Abanye abantu abenza lo mkhuba ngonjiniyela ezitudyo, ngokuthi abaculi basuke befuna okhehlegume abathile okuthiwa ngama- sound effects ababazwile sebezoya esitudyo esisodwa belandela bona. Sekuyoba wuhologo bekhipha into eyodwa.
Kusafanele sizwe ingoma iqalwa ngobhesi noma ngomsindo wenyoni, kumbe owamagagasi ngisho ukukhwehlela imbala abantu baqale okwabo okuyolandelwa ngabanye. Akukho mgomo ebekelwe umculi ukuthi ayithake kanjani ingoma yakhe. Abaculi baphesheya bayakwenza lokhu.
Ngike ngezwa izingoma zomunye umculi we- gospel oshaye ingoma emnandi ekusukumisa phansi kepha umdlali wezinsimbi leyo ngoma uyincishe obhesi abayifanele, kwathi ezinye wababhabhazisa esikhaleni.
Abaculi kuhle bawazi umona ocashile okhona kubadlali bezinsimbi, yimfihlo lena eyaziwa ngabantu abaphethe izinkampani zomculo nabanezitudyo. Abadlali bezinsimbi bayakwenzela phansi uma befuna okuthile bengakutholi bese bekulaya ngokugcina icala uma bedlala.
Abanye kusuke kungesiwo umona kepha uma sebeqalekile noma sebefuna ukuya ezindleleni zabo sebenza bejahile ngoba iningi labo alinandaba nomsebenzi, lisuke lizifunela imali yokuyofeza izidingo zalo.
Bayatholakala abakwazi ukusiza umculi uma efuna umsebenzi wakhe uthakwe. Umculi angafike aqophe aqede bese ethatha lowo msebenzi ungakahlanganiswa ( mixing) awuzwise uphrojusa onesiphiwo sokuthakwa kwemisindo, uzosho ukuthi hlobo luni lwezinsimbi noma imisindo efanele lelo phimbo noma lowo mculo, kube yimake ubuyela estudyo uyothakwa.
knowledge.simelane@ilanganews.co.za