Mazihlawule izikhulu ezibudedengu
KUQOPHEKE umlando kuleli sonto ngesikhathi inkantolo yomthethosisekelo inquma ukuba ungqongqoshe owayekade engamele umnyango wezezimpesheni phambilini, unkz Bathabile Dlamini, kufanele akhokhe ingxenye ethile yemali yezindleko zecala elalimayelana nokusebenza komnyango wakhe.
Ukuveza umlando omfushane ngalolu daba, unkz Dlamini waba nomdonsiwano nezinhlangano ezilwela amalungelo abantu ezizimele, iblack Sash nefreedom Under Law, kulandela ukuhudula izinyawo komnyango wakhe nenhlangano engaphansi kwawo esingethe ukukhokhwa kwezimpesheni, isouth African Social Security Agency (SASSA), ekudluliseleni umsebenzi wokuholela izimpesheni kwenye inkampani, ususwa enkampanini ezimele icash Paymaster Services (CPS).
I-CPS yaphucwa lo msebenzi kulandela isinqumo senkantolo yomthetho-sisekelo sokuthi inkontileka phakathi kwale nkampani NE-SASSA, yayingekho emthethweni, ngakho kufanele ithenda yokwenza lo msebenzi inikwe enye inkampani.
Inkantolo ithole ukuthi unkz Dlamini wadukisa inkantolo ngesitatimende esifungelwe ( affidavit) esaphuma egameni lakhe mayelana nezinguquko ezazenziwa wumnyango wakhe mayelana ngokuphela kwenkontileka YECPS.
Inqume ukuba unkz Dlamini, manje osewungqongqoshe wezindaba zabesifazane, ahlawuliswe ngalesi senzo ngokuba akhokhe amaphesenti angu-20 ezindleko zecala.
Inkantolo ibuye futhi yanquma ukuba isinqumo sayo sidluliselwe emnyangweni wabashushisi, inational Prosecuting Authority (NPA), ukuze uphenye icala lokuthi ungqongqoshe waqamba amanga esitatimendeni sakhe.
Njengoba bekulindelekile, emuva kokuphuma kwesinqumo senkantolo, amaqembu aphikisayo asephakamise ukuba umengameli Cyril Ramaphosa amkhombe indlela unkz Dlamini. Empeleni ukuba siyizwe eselivuthiwe ngenqubo yentando yeningi njengamazwe asentshonalanga, unkz Dlamini ngabe usevele wazifakela yena isicelo sokwesula emsebenzini, ngoba isinqumo senkantolo sithela ngehlazo uhulumeni ayingxenye yawo, naye uqobo.
Sethemba ukuthi isinqumo senkantolo sizoba yisifundo kwabaningi, sibala lapha ongqongqoshe nezinye izikhulu zikahulumeni, abajwayele ukusebenzisa imali yabakhokhi bentela budlabha, ngokuqhubeka nokufaka amacala ezinkantolo noma besephutheni.
Sengathi izinkantolo zingaqhubeka nokunquma ukuba izikhulu ezibudedengu ekwenzeni umsebenzi wazo nasekusingatheni imali yomphakathi zihlawuliswe ngokuba zikhokhiswe imali zona siqu sazo.
Lokhu mhlawumbe kungasiza ukuqinisekisa ukuthi ziwenza ngendlela umsebenzi eziqashelwe wona, isetshenziswe ngendlela efanele nemali yethu.