UKUPHAWULA KWABAHLAZIYI
INKINGA yokusweleka kwemisebenzi eningizimu Afrika ngenye yeziphambili ezikhinyabeza intuthuko yomnotho nentuthuko yomphakathi jikelele kuleli lizwe.
Ngolwesithathu kuleli sonto istats SA iphinde yakhipha umbiko ongemuhle neze, othi ibalelwa ku-69 000 imisebenzi elahlekile esigamini sesibili salo nyaka.
Lokhu kuletha okukhulu ukukhathazeka njengoba vele izinga lokusweleka kwemisebenzi liphezulu ngendlela eyinqaba.
Okunye okulahlisa ngethemba yile mibiko elokhu ivela yezinkampani ezisezinhlelweni zokudiliza izisebenzi.
Ngawo ulwesithathu isouth African Federation of Trade Unions (SAFTU) igxeke imibiko yokuthi ISABC isezinhlelweni zokudiliza izisebenzi.
Umnu Zwelinzima Vavi, ongunobhala jikelele WESAFTU, esitatimendeni sale nhlangano ukuhlabile lokhu, wathi ISAFTU izozeseka izisebenzi ZESABC ezala ukwamukela ukudilizwa kwazo njengesixazululo ezinkingeni ZESABC.
Kuvela le ndaba yasesabc nje, kusanda kusuka omunye umsindo oqubule ukukhathazeka ngemuva kokuzwakala kwezindaba ezithi uhulumeni, oholwa ngumnu Cyril Ramaphosa, uhlongoza ukudiliza izisebenzi zakhe ezibalelwa ku-30 000 ngenhloso yokunciphisa izindleko njengoba iningizimu Afrika idonsa kanzima kwezomnotho.
Kuthiwa uhulumeni wethemba ukonga isamba esingu-r20 billion wesabelomali saminyaka yonke.
Nakuba uhulumeni usheshe wayichitha le mibiko, nokho izindaba ezivele emaphephandabeni maqondana nalesi sihloko zithi lokhu bekudingidiwe kabanzi ngukhongolose nomhlangano wekhabhinethi obizwa ngelekgotla, kangangoba kuvele nokuthi bekunesamba esingu-r4 billion ebesilungiselwe abazothatha imali yabo yokwesula emsebenzini ( severance packages). Abadilizwa yizinkampani ezizimele ababaliwe kulezi zibalo.
Njengoba kuza ukhetho ngonyaka ozayo, akwethusanga uma uhulumeni eyichitha le mibiko yezinhlelo zokudiliza.
Lokhu kuyizinkomba zokuthi emuva kokhetho singase sikubone lokhu kwenzeka njengoba vele kuyaziwa ukuthi uhulumeni unesibalo eseqile kwesifanele futhi akucashile ukuthi lokho kubangelwa yini kwazise ezombusazwe zinesandla ngokusobala kukho. ILANGA Langesonto like laxhumana noprof Bongile Mayaba wenkampani ezimele IBMM Incorporated, ukuba ake aphawule ngokuthi usibona kanjani isimo maqondana nombuzo othi singase sikubone yini kwenzeka ukudilizwa kwezisebenzi zikahulumeni lungakadluli ukhetho lwangonyaka ozayo u-2019?
Uthe awekho amathuba okuba lokhu kwenzeke lungakadluli lolu khetho.
Ube esenza isibonelo ngohlelo lukamengameli Ramaphosa lokukhwezela umnotho ( economic stimulus package) ngo-r50 billion lapho kuthathwa imali ebikade iqondene nezinye izinhlelo zikahulumeni ezichazwe ngokuthi azivezi izithelo bese ifakwa kulezo zinhlelo ezinentshukumo, njengemboni yezolimo, ukuze kufukulwe izwe kwinzikamnotho.
Uthe inkulumo kamengameli Ramaphosa ayikhulumi lutho ngokudiliza izisebenzi, esikhundleni salokho kuvele ukuthi umnyango wezempilo kudingeka ugcwalise ngokushesha izikhala onazo ezingu-2 200!
Ngaphandle kwalokhu, uthe ukudiliza izisebenzi zikahulumeni akufani nokwezinkampani ezizimele ngoba kudinga kube nezingxoxo ezidonsa isikhathi eside phambi kokuba kwenzeke.
Okwesibili, kudingeka kuhlonzwe lezo zikhala ezigcwalisiwe kodwa ongabonakali umsebenzi owenziwa yilezo zisebenzi, okuyinto engakenzeki namanje. Okunye futhi wukuthi kudingeka kube nakubize nge- core succession planning.
Kuleli phuzu wenze isibonelo ngokuvalwa kwamakolishi okuqeqesha othisha okwenziwa ngokutatazela ngoba kuthiwa sekuzoba ngamanyuvesi kuphela azokwenza lowo msebenzi.
Okulandele lapho wukuthi amanyuvesi awanazo izikhala ezanele izibalo ebezithathwa emakolishi othisha, futhi nesibalo sabantu jikelele ( population) asimile, senyuka njalo.