LUNGENWA YI-UN OLUKA-CASTER
SELUNGENELELWA yi-united Nations (UN) udaba lobulili bukacaster Semenya njengoba i-international Association of Athletics Federation (IAAF) ihlongoza umthetho ozonqinda abasubathi abanobulili obufana nobalo msubathi ukugijima amabanga athile.
Lo mthetho kulindeleke ukuba uqale ukusebenza mhla ka-1 kuLwezi (November). I-IAAF ithi ucaster kufanele ayeke ukugijima ibanga lika-400m kuya ku1500m, okungenani agijime amabanga angaphezulu kwalawo noma asebenzise amaphilisi ukwehlisa amandla emvelo azalwa nawo angaphezulu kwajwayeleke kwabesifazane.
Lo mthetho ohlongozwayo kawehlanga kahle kwabaningi kanti I-UN kuthiwa isingenelele kulolu daba. Leli phephandaba litshelwe ngumengameli we-athletics South Africa (ASA), u-aleck Skhosana, ukuthi udaba lukacaster selungenelelwe yi-un. Uskhosana uthe ukungenelela kwe-un kubanika elikhulu ithemba lokuthi bazolunqoba.
“Abameli bakacaster nabethu baphezu kwalo lolu daba. Ukungenelela kwe-un nayo ekhala ngokuhlukunyezwa kwamalungelo kacaster kusinika elikhulu ithemba lokuthi sizoyinqoba le mpi.
Kuzokhumbuleka ukuthi sike sahlangana NE-IAAF kodwa sagcina singavumelananga ngalutho, saze saledlulisela kwiCourt of Arbitration for Sports (Cas) esesilinde ukuba ikhiphe isinqumo sayo ungakashayi umhla ka-1 okuwumnqamulajuqu WE-IAAF,” kusho uskhosana.
Ngemuva kokuba I-IAAF ikhiphe lolu daba, ucaster uthole ukwesekwa kubantu abaningi bezemidlalo emhlabeni.