ESKHALENI:
NAKUBA kukuningi okuhle okwenziwa ngamazulu FC ukuzama ukuthuthukisa unobhutshuzwayo Kwazulu-natal kodwa izikhulu zale kilabhu kubukeka zishaye eceleni ngokuzama ukuphonsela inselelo icourt of Arbitration for Sport (Cas) eyalele le kilabhu ukuba ikhokhe inhlawulo ngokuxosha uphinheas Nambandi waseNamibia ngo-2014.
Ngokuqonda kwethu, isinqumo secas siwujuqu, ngeke ukwazi ukusiphonsela inselelo. Lokhu kucacile nasesitatimendeni esithunyelelwe abezindaba ukuthi usuthu belwazisiwe ukuthi nxa lungayikhokhi inhlawulo, luzophucwa amaphuzu ayisithupha olungeke lukwazi ukuphikisana nakho.
Kuphinde kwacaciswa ukuthi uma lusaqhubeka nokugoloza, luzoshovelwa esigabeni esiphansi, okungesenational First Division (NFD).
Ukuhhundulwa kwamaphuzu, kushaye kwezwela osuthwini njengoba seluthathe isinqumo soku- yikhokha ngokushesha le nhlawulo okuyinto eqinisekiswe ngubrilliant Mkhathini ongumxhumanisi wosuthu nabalandeli.
Sikholwa wukuthi ukuba usuthu beluphethe abameli abasebenza ngonobhutshuzwayo nsukuzonke, belungeke lukhalakathele kule ngozi oselukuyona njengoba sekumele luqale luvike izembe kwazise selubambe ibhuleki kwi- log yeAbsa Premiership. Abameli abasebenza ngonobhutshuzwayo bakuqonda kahle ukuthi isinqumo secas siwujuqu.
Le kilabhu seyibhekene nenselelo enzima yokulwela ukuxaxama emsileni njengoba seyisele nephuzu elilodwa emidlalweni eyisi-6 kuthi amakilabhu angaphezulu kwayo abe nangu-5. Kwenzeka lokhu nje, besisaluncoma usuthu ngokubambisana nezikole ngenhloso yokuvundulula nokupholisha ikhono labadlali abasafufusa kunobhutshuzwayo.
Usuthu selukhombisile ukuthi impumelelo ikhona kunobhutshuzwayo ezikoleni okuyinto ebivele yenzeka phambilini.
Usuthu lunenqwaba yabadlali abasebancane abafunda eglenwood High School ebimele isifundazwe emidlalweni kazwelonke yecopa Coca Cola U/15 esongwe izolo ngomgqibelo ewolfson Stadium, ebhayi.
Iglenwood ishiye kukhalwa ngekhono elikhonjiswe ngabadlali bayo nangendlela ehlela ngakhona izinto zayo. Ilale isithathu.
Usuthu lunethuba lokubuyisa abalandeli bezinye izinhlanga emidlalweni yasekhaya njengoba iglenwood igijima ngabadlali abahle bezinhlanga ezahlukene.
Lesi sikole sidlalelwa ngabadlali abampisholo, abamhlophe, amakhaladi ngokunjalo namandiya.
Bonke laba badlali bayalikhulumisa ibhola, akekho ongathi ufakwe ngokwenzelelwa.
Ezinye izinhlanga zingabuya Sibancoma kakhulu nabazali bezingane ezifunda eglenwood abadela konke bahambe amabanga amade beyokweseka izingane zabo emidlalweni kazwelonke.
Abazali bezingane zaseglenwood bayaziwa ukuthi bayihambela yonke imiqhudelwano esuke idlalwa yilesi sikole, futhi bazinakekela ngokufanayo zonke izingane ngisho nalezo abasuke bengekho abazali bazo.