OSOMABHIZINISI BASE-CHINA BAKHONJWA KWI-TEAM OF CHOICE
ZIYA ngokuqina izinsolo zokuthi kuneziqumama ezizinze phesheya kwezilwandle ezifuna ukuthenga amasheya kwimaritzburg United eholwa ngufarook “Ntshebe” Kadodia ( osesithombeni).
Iteam of Choice ingenye yamakilabhu athwele amathemba akwazuluNatal kwiAbsa Premiership.
Ngesizini edlule iphakamise ifulegi lakulesi sifundazwe iqeda ikwi- top 8, yaphinda yafinyelela kowamanqamu wenedbank Cup.
Leli phephandaba lithole ukuthi ukwenza kahle kwemaritzburg, kuhehe iso leziqumama zaphesheya okuthiwa zifuna ukuthenga amasheya kule kilabhu.
Kuvela ukuthi sezike zaxhumana nokadodia kodwa akukacaci ukuthi kuvunyelwane ngani.
Leli phephandaba lihletshelwe ukuthi yiziqumama zasechina okuthiwa zifuna ukungenisa ebholeni lakuleli. Leli phephandaba lishayela ukadodia ngalolu daba, ungene ezintangeni wathi belungakafinyeleli kuyena. Nokho akakufihlanga ukuthi uma kungaqhamuka umuntu nemali angayidedela ingxenye yamasheya akhe ekilabhini.
“Engingakusho wukuthi akekho umuntu oseke weza kimina wathi ufuna ukuthenga amasheya, uma ekhona ubengakangithinti. Kodwa ngifuna ukukubeka kucace ukuthi izandla zami zivulekile, onesifiso sokuthenga amasheya ekilabhini angeza sixoxe. Angifuni umuntu onemadlanyana nje, ozofuna ukuphoxa ikilabhu yethu, kufanele kube ngumuntu onothile. Angikhethe bala, noma ngubani angeza noma ngabe ngowaphesheya noma ngowalapha kanginankinga, yinqobo nje uma ezoza ngenhloso yokuyisa le kilabhu phambili,” kusho ukadodia.
Uthi kunzima ukuphatha ikilabhu uma ungenabo abaxhasi.
“Ibhola siyalithanda kodwa liyaphundlana, lishiya amaphakethe ebhobokile. Njengoba singenabo abaxhasi nesimo somnotho sintenga kanjena nje, kunzima, amabhizinisi athwele kanzima. Kodwa-ke sizoqhubeka nokuyilwa le mpi yize kunzima,” kusho ukadodia ezakhe ezizobhekana namazulu FC koweligi ngolwesibili ngo-19h30 eking Zwelithini Stadium, emlazi.
Imiphumela YENFD izolo ngomgqibelo: Royal Eagles 1, uthongathi FC 0; Cape Umoya 1, Mbombela Utd 0; Tuks 0, Maccabi 0; Stellenbosch 2, Real Kings 0; Tshakuma 0, Cosmos 0; TS Sporting 1, Ubuntu 0.