Umsindo ngesithombe sikaqueen kwitwitter
"Ngizibona ngiyinxusa labaphila nesifo sikashukela"
SIPHENDUKE ibhola lomnqakiswano isithombe somlingisi ophinde abe ngusomabhizinisi, usophie Ndaba, lapho ebonakala khona enciphile emzimbeni kunalokho ajwayeleke eyikhona.
Kulesi sithombe usophie, oke waduma kakhulu ngelikaqueen Moroka esalingisa kwigenerations KWISABC 1, ubonakala eshuthe emile embethe u- blanket emahlombe.
Usophie uphenduke isisulu seblack Twitter - okusho isigcawu sabangcofanayo kule nkundla - ngesikhathi kusabalala lesi sithombe. Nakuba abanye bebemngcofa kodwa abanye bebezwakalisa ukuzwelana naye.
Ngemuva kokusabalala kwesithombe sakhe, usophie ubhale ekhasini lakhe kwi-instagram wathi isinqumo sokwehlisa isisindo somzimba usithathe ngenkathi elaliswa esibhedlela ngelinye ilanga ngenxa yesisindo (esiphezulu).
Uthe ayikho into angayisho ngaphandle kokwedlulisa uthando kubangani nomndeni abathintekile ngokwehla kwakhe emzimbeni.
“Ukuphila ne- diabetes kusho ukuthi kumele ngilwe ukuze ngilethe ithemba kulabo abaphila nalesi sifo esingumbulalazwe. Asibasize labo abanaso siqwashise nalabo abangafundisekile ngaso,” kusho yena.
Uthe isinqumo sokusukumela lesi sifo wasithatha emuva kokushona kwabazali bakhe bobabili abathathwa yiso lesi sifo.
“Yimina engangibanakekela kwaze kwaba wukuhamba kwabo emhlabeni, ngakho ngiyazi ukuthi lesi sifo siyabulala. Yingakho abantu begcina sebezibulele nje ngoba kukhona abavele bakuphose ngamazwi alumelayo, uvele uphelelwe yithemba.
“Yize kubuhlungu konke lokho, ngikushaya indiva ngoba nginomndeni wami ongesekayo nomyeni wami oyisibusiso,” kusho yena.
Unike ithemba labo abaphila nesimo sokukhuluphala ngokweqile ( obesity) ukuba bangadangaliswa yilabo ababahlulelayo uma benciphisa imizimba yabo.
“Ngizibona ngiyinxusa labaphila nesifo sikashukela nalabo abaphila nesimo sokukhuluphala ngokweqile bebe besaba ukubhekana nakho.”