IBAFANA IZIGWAZELE IBHECE KOWE-CAF
Ibhubhise iseychelles ngembudlu yamagoli
IBUYISE ithemba ibafana Bafana inenebula ngo-6-0 iseychelles emdlalweni ka-group E, kowokuhlungela i-africa Cup of Nations (Afcon) izolo ngomgqibelo ntambama EFNB Stadium, esoweto.
Amagoli ebafana ashaywe ngonigel weseychelles okube ngumkhonto ogwaze ekhaya ngomzuzu ka-23, nguthulani Hlatshwayo ngoka-25, ngulebohang Mothiba ngoka-27, ngupercy Tau ngoka74, ngudino Ndlovu ngoka-81 nelikatebogo Mokoena ngoka-92.
Le wini ibuyise ithemba kwibafana lokuthi izoya kule midlalo ye-afcon ezokuba ngonyaka ozayo egabon.
Bekunovalo kwazise ihlulwe wukushaya ilibya ekhaya ibambana nayo ngo-0-0 emasontweni ambalwa edlule.
Nokho ibafana bekuvele kubhekwe ukuthi izicoboshisele kuleli qembu njengoba lingenamlando ebholeni. Abadlali balo bonke bagijima esigabeni sama-amesha. Ngaphandle kwalokho iningi labo liyasebenza kaliphili ngebhola.
Ibafana izophinde ibhekane naleli qembu emlenzeni wesibili ozokuba ngolwesibili ngo-15h30 eseychelles. Uhlatshwayo ukaputeni webafana uthi ibajabulisile indlela abanqobe ngayo.
“Le kilabhu asizange siyithathe neze kancane besizinikele yize besazi ukuthi ayinamlando otheni ebholeni. Ngeke ngiqambe amanga akukho bunzima abasinike bona besiphumule. Okuhle wukuthi sikwazile ukuhlohla inqwaba yamagoli ukuze sibuyelwe wukuzethemba,” kusho uhlatshwayo.
Uthi umsebenzi awukapheli njengoba belibhekisa eseychelles.
“Umsebenzi osasihlalele mukhulu ngoba kusafanele sigijime eminye imizuzu engu-90 nabo. Kufanele siqhubeke nokudlala ngokuzinikela singathathi ngokuthi sibahlulile ekhaya ngoba asazi sizoficani ekuhambeni. Kodwa angifuni ukuqamba amanga sizowunqoba lo mdlalo futhi kalula,” kusho uhlatshwayo.
Ibafana iqale lo mdlalo ibophele kanje: Itumeleng Khune, Ramahlwe Mphahlele, Sifiso Hlanti, Hlatshwayo, Buhle Mkhwanazi, Dean Furman, Kamohelo Mokotjo, Lebohang Maboe, Tau nomothiba.