Babhizi bapheka icwecwe elisha

KONKE kwaqala kuyiphupho kumalungu edistruction Boyz, kodwa konke abekufisa sekuyenzeka. Leli qembu lihlanganiswe ngabafana ababili abasebancane bakwamashu, uthobani “Que” Mgobhozi (23) nozipho “Goldmax” Mthembu (23).

Ukunqamula amazwe kwakungelinye lamaphupho abo futhi bengaziboni ukuthi bayoke bafinyelele kulelo zinga lokuntweza ngamabhanoyi behamba ngomsebenzi abawuthandayo.

Ukungena emculweni bakuqala kancane besesesikoleni samabanga aphakeme benza ama- mixtape. Uque wayefunda eferndale High School, ugold efunda enqabakazulu Secondary School, Kwamashu. Uma bebuya esikoleni bebengahlukani, bengabangani abakhulu, abazali babo bazi ukuthi uma omunye engekho, uzotholakala kubo komunye.

“Kwakungemnandi kubazali uma siphuma (sihamba) njalo ngezimpelasonto sibuye ekuseni, bona babengazi ukuthi sinaliphi iphupho, kodwa babebheke ukuthi senze kahle esikoleni,” kuchaza bona. Bayakuqonda ukuthi wonke umzali uma ekhulisa ingane, usuke engayifundiseli ukuba ibe ngudj noma umculi, kodwa yiyona ingane esuke izazi ukuthi ufuna ini.

Bathi njengamanje sekumnandi kubazali babo ngoba ukunyamalala kwabo ngezimpelasonto sekuthela izithelo.

ILANGA Langesonto beliphole nabo emzini kanokusho abahlala kuwona osendaweni yabadla izambane likapondo, ewestville, ethekwini. Kulo muzi kuhlala bona, kuphithizela nezinsizwa abasebenza nazo. Abafana abasebancane njengabo bavame ukungabi nayo yonke into abayidingayo.

Ufica ezindaweni abahlala kuzo kuphithizela isifazane, kuphuzwa. Lapha kubonakale okwehlukile njengoba bekusha umsebenzi. Ugold ubejuluke emanzi eseze waqimba ngasenhla epheka izingoma zabo ezintsha, ngakolunye uhlangothi uque ubelele kuthiwa ukhathele usebenze ubusuku bonke. Akachithanga sikhathi esezwa ukuthi ILANGA Langesonto selifikile.

KUVULEKE AMAZULU NGO-2015

Baqale ukwenza umsebenzi obonakalayo ngo-2012 besadlala ezindaweni ezingasemakubo nasemicimbini yasendaweni. Ngo-2015 kwavuleka amazulu kubona ngengoma yabo ethi “Uzophuzamanzi”. Bathi yiyo le ngoma eyabafaka ezindaweni zangempela, bathola ithemba lempilo engcono.

“Ngaleso sikhathi sasibizwa ezindaweni sidlala mahhala, kodwa lokho kwasisiza ngoba sakwazi ukuthola ithuba lokuvela ebantwini. Abantu abanezindawo ethekwini baseseke kakhulu besiqasha singakadumi, kwaze kwafika lapho senza khona ingoma kababes Wodumo esihloko sithi Wololo, okuyiyona naye eyamfaka ebantwini,” kuchaza bona.

Ngokuhamba kwesikhathu luqhubekile nokukhula udumo lwabo njengoba bese bemenywa ngisho emazweni angaphandle kwaseningizimu Afrika.

Bayazigqaja ngokwenza i'gqom' ukuba ibe ngolunye uhlobo lomculo ohamba phambili. “Phambilini i'gqom' ibingadlalwa emisakazweni, kodwa isikwazi ukuhlukanisa ngisho unyaka. Okwakwenza ukuba ingadlalwa wukuthi i'gqom' ebiyenziwa kuqala, ibinomsindo ingawenzi umqondo kubantu, kodwa ilalelwa kakhulu ngabantu abaphuzile. "Thina nabanye abafowethu esinabo kule ndima siyenza yahlanzeka ( clean) futhi inomyalezo."

Bathi iphupho labo elikhulu wukuba i'gqom' ifike ezingeni lokuzimela, kukhulunywe ukuthi sekukhona nomcimbi wezindondo wayo njengakwi- gospel nakumaskandi.

BANOMSIKI WENGQEPHU

Idistruction Boyz iqopha ngaphansi kwenkampani yayo, idistruction Boyz Records, bese kuthi umculo wabo usabalaliswe yi-afrotainment. Banamanye amaciko abawaphekayo okubalwa udrega wase-eastern Cape kanye nok Dot. Bathi into ebahlupha kakhulu yisikhathi njengoba bematasa behambela amazwe.

“Njengoba ubona nje kuphithizela la ekhaya, uma sithole ithuba elincane siyasebenza ngoba sihlale singekho,” kusho bona. Bathi enye into ebalulekile uma uyiciko, wukubheka indlela obukeka ngayo phambi kwabantu.

“Akumele kwaziwe ukuthi ukuswenka yinto yabantu bohlobo oluthile lomculo, kodwa noma ngabe ucula muphi umculo, kumele uhlale ubukeka kahle. Thina sinomandisa Mdunge okunguyena esamqasha ukuba abheke ukuthi sigqoka kanjani,” besho. Umandisa baqala ukusebenza naye bengakadumi, kodwa ubelokhu ewa evuka nabo ebathungela aphinde ababonise ukuthi kumele bagqoke kanjani.

BANOVALO NGENDONDO YAMAMTV EMA

Idistruction Boyz isike yaqokwa emicimbini yezindondo eminingi ngisho kweyamazwe omhlaba okubalwa i-african Muzik Magazine Awards (AFRIMMA), All Africa Music Awards (AFRIMA). Bake bahlonishwa ngebet Gold Status.

Njengamanje baqokwe kumaMTV EMA (Europe Music Awards) babheke ukubuya nendondo kulo mcimbi ozobe useSpain ngolwezi (November) kuwona lo nyaka.

Umuntu abanovalo ngaye abaqhathwe naye kulo mncintiswano, ngumculi wasenigeria, udavido. “Sinebhadi njalo sihlale siqhathwa nodavido, kodwa kulokhu sifuna ukumehlula.

"Sike samehlula kanye. Siyacela abantu baseningizimu Afrika ukuba basivotele, ukuze sizobuya nayo. Uma siyithola le ndondo kuzobe kungeyona eyethu kodwa simele iningizimu Afrika yonke njengoba kuyithina noshekinah (abaculi bakuleli) abaqokiwe,” kuchaza bona.

Bathembisa lukhulu ngecwecwe labo elizophuma abapike kulona udladla Mshunqisi, udrega, utira, umr Easy, uk Dot nabanye. Bahlele ukuthi ubabes Wodumo naye abe khona kuleli