Bafuna intsha yasemsinga ifunde
Bazoyikhuthaza ngomcimbi wezifundiswa
KUZOKHUTHAZWA intsha yasemsinga ngokubaluleka kwemfundo emcimbini wezifundiswa ozokuba ngomgqibelo ozayo womhla ka-27 kwephezulu emawele High School, emsinga Top.
Lo mcimbi uhlelwa wumndeni kamnu Mjabuliseni Isaac Madondo oyijaji elihlonishwayo Kwazulu-natal.
Umndeni kamadondo usuzakhele igama ngokukhiqiza izifundiswa njengoba sebengu-9 abathweswe iziqu kulo mndeni. Abane bebethweswa iziqu kulo nyaka, kanti abathathu kubona bebengaqali ukuthweswa iziqu.
Umadondo uthi unqume ukusebenzisa umcimbi wempumelelo yomndeni wakhe ukukhuthaza intsha ngobumqoka bemfundo.
“Akukuhle ukuthi indawo yasemsinga yaziwa ngezimpi. Ngifuna ukuthi indawo yangakithi idume ngokukhiqiza intsha eyizifundiswa. Izingane zethu kumele sizikhuthaze ukuba zifunde, kuqe- dwe izimpi zezigodi nokwebiwa kwemfuyo.
“Indawo yasemsinga inenqwaba yabantu abangasebenzi, okwenza kubhoke kakhulu indlala. Yingakho-ke nginqume ukuhlela lo mcimbi ukuze sikhuthaze intsha ngobumqoka bemfundo. Nginenkolelo yokuthi imfundo yiyona kuphela engaphendula isimo sasemsinga sibe ngcono.
“Ngimeme izifundiswa eziyinqwaba ukuzokhuthaza intsha, kanti kuzona kukhona amajaji nabameli,” kusho umadondo obenengxoxo ekhethekile naleli phephandaba ngolwesibili emini ehhovisi lakhe enkantolo enkulu yasethekwini.
Lolu galagala lwejaji lusanda kushicilela incwadi esihloko esithi The Role of Traditional Courts in the Justice System.
Umadondo nguyena osebenza icala elibhekene nomnu Jacob Zuma obengumengameli waseningizimu Afrika, alisuse ethekwini walishova emgungundlovu.
Nguyena futhi okhiphe isinqumo ecaleni lebandla lakwashembe ebese lidonse isikhathi eside.
philanin@ilanganews.co.za