Bafisele umfu Mholi impilo ende
UBUSISWE ukuba khona kowayengumengameli wezwe, umnu Jacob Zuma, umcimbi wokucelela impilo ende umfundisi Mholi Clive Maphumulo (35), ongumholi webandla, ifather Masango Apostolic Faith Mission, e-adams.
Umfu Maphumulo udume njengemali ngemisebenzi yakhe yokuphilisa abantu ngokomphefumulo nangokwenyama nakwezinye izidingo zabantu.
Umsholozi ufike wemukelwa ngenkulu inhlokomo ngamalungu ebandla namakhosi endawo namakhansela. Akabanga mude ngenkulumo, utshele amakholwa ukuthi umfu Maphumulo ungumngani wakhe futhi unguyise kwezikalizwi.
Uthe: “Ngiyayincoma kakhulu imisebenzi yakhe nesiphiwo sokukhulekela izinkinga zabantu. Baningi abasizile, ngingufakazi. Unkulunkulu umphile isiphiwo yingakho nami ngimfisela impilo ende nenhle emsebenzini wakhe. Inkosi imandisele izinsuku,” kuphetha umsholozi.
Umfundisi Leonard Nkosi wasemlazi nguye ophake izwi leNkosi, wacaphuna encwadini kaIsaiah 38 ivesi lokuqala kuya kwelesi-8, lapho kufundeka khona kanje: “Ngalezo zinsuku uhezekiya wagula, wayephansi kokufa. Kwafika kuye u-isaya umphrofethi, indodana ka-amose, wathi kuye 'usho kanje ujehova, uthi yalela indlu yakho ngokuba uyakufa, awuyikusinda.'
“Uhezekiya wayesephendulela ubuso bakhe odongeni wakhuleka kujehova wathi, “Ngiyacela Jehova ake ukhumbule ukuthi ngihambile phambi kwakho ngeqiniso nangenhliziyo epheleleyo, ngenzile okuhle emehlweni akho.
“Wayesekhala kakhulu uhezekiya. Lase lifika ku-isaya izwi lathi: 'hamba uthi kuhezekiya usho kanje ujehova unkulunkulu kadavide, uyihlo, uthi ngizwile umkhuleko wakho, ngibonile izinyembezi zakho, ngiyokwenezela izinsuku zakho iminyaka eyishumi nanhla- nu, futhi ngiyakophula wena nalo muzi wakho esandleni senkosi yase-asiriya, ngiwuvikele. Lesi kuyokuba yisibonakaliso esivela kujehova sokuthi ujehova uyokwenza lokho akukhulumile'.
“Namuhla sihlangene lapha ukuzonxusela umholi wethu, umfu Maphumulo, ukuba inkosi imandisele izinsuku zakhe zokuphila.
“Ujehova nguye owazi nophethe izinsuku zakhe zokuphila, kumele simnxuse ngaso sonke isikhathi. Uma sithi inkosi imandisele, nathi siyazibala sonke njengebandla ukuba isiphe ukuphila.
“Akumele siphile emhlabeni sengathi siyizilwane ezingazi ukuthi kukhona owasiletha emhlabeni, unkulunkulu wethu. Kanjalo ma-st Johns kumele nihlale niyibeka inceku emikhulekweni, lo mholi uneziphiwo eziningi zokuxazulula izinkinga ezinkulu zabantu,” kusho umfu Nkosi.
Phakathi kwezitatanyiswa ebezikhona kule nkonzo kubalwa nenkosi Nkosinathi Maphumulo, okhale ngobuncane bendawo okumi kuyo isonto, wathi ngendlela abantu abahlale befika ngobuningi babo kulo, isincane sekumele kutholakale enkulu ngokwanele, wabe esefisela umfowabo impilo ende.
Bekukhona nobukhosi bakwaNtshangase enkandla, undunankulu wenkosi yendawo, umnu Mbongeni Makhaya, nekhansela lendawo, umnu Lihle Maphumulo.
Naphezu kokuba bekuyinkonzo kepha kubonakale abantu beshaye ujenge nezipakupaku becela amanzi echibi, befuna izibusiso. I-brass Band yiyo eyemukele umsholozi yaphinde yanandisa.