Uyinkabi eb ngokucikoza
LIZICHAZA njengenkabi ebulala ngamagama iciko elilaxaze phansi ukuba ngusomatekisi langena emkhakheni womculo. U-big Zulu, ogamalakhe langempela usiyabonga Nene, uthi besekuneminyaka elangazalele ukungena emculweni. Uthathe isinqumo sokulaxaza phansi umsebenzi wakhe wokuba ngusomatekisi wangena emculweni ngokugcwele.
Lo mculi, odabuka ebergville, ekhuluma ne- LANGA Langesonto, uveze ukuthi nakuba sekuneminyaka esemculweni kodwa uqale ukugxila kuwona ngo-2009 lapho eqale ukukhipha khona izingoma.
Nakuba eqale ngo-2009 ukukhipha izingoma kodwa kulo nyaka ukhethe ukudedela i-albhamu yakhe yokuqala. Uthi ukuba yiciko yinto azalwe nayo kwazise ngaphandle kokucula useke wabonakala emidlalweni kamabonakude okubalwa kuyo Isibaya nesithembiso.
Echaza ngokungena kwakhe kumabonakude uveze ukuthi bekuyiphupho lakhe ukungena emdlalweni Isibaya kwazise ukhuluma ngomkhakha awazi kangcono wamatekisi.
“Nakuba bengikulangazelele ukungena kulo mdlalo kodwa ngesikhathi ngithola ithuba lokuvela kuwona okokuqala bengizoba soquqabeni nje. Ngishiye ngingakaqali nokuqopha ngoba bekungekhona ebengikufuna lokho. Iphupho lami bekuwukuthola ithuba lokulingisa hhayi ukuba yi- extra.
“Yilapho ngenze imizamo yokuxhumana nalowo oqoka abalingisi kulo mdlalo ukuba bangithinte uma sekukhona indawo okuzomele ngiyilingise ngokugcwele,” kuchaza yena.
Uthi ngemuva kwesikhathi bamthintile, kwayilapho ethola ithuba lokuba wumlingisi kulo mdlalo.
Uthi nakuba elingisa kodwa umculo iyonanto ehamba phambili kuyena.
“Umculo ngiyazifela ngawo kanti uhlobo lomculo engiwuculayo ngiwubiza ngenkabi Rap. Igama lenkabi ngilisusela ematekisini elichaza umuntu obulalayo. Ngakho mina ngibabulala ngamagama emculweni wami,” kuchaza ubig Zulu osanda kukhipha i-albhamu esihloko sithi, “Ushuni Wenkabi”.
Lo mrepha, oxuba umaskandi ne- hip hop
emculweni, uthi ngaphandle kokuba yiciko uphinde abe yinxusa lezingubo zokugqoka zakwabrentwood.
lucky.cain@ilanganews.co.za