Kubuya izinduku kwabasinda enkembeni
HALLOWEEN UMQONDISI: David Gordon Green ABADLALI ABAPHAMBILI: Jamie Lee Curtis (Laurie Strode), Judy Greer (Karen Strode), Andi Matichak (Allyson Strode), Nick Castle & James Jude Courtney (Michael Myers), Haluk Bilginer ( Dr Ranbir Sartain), Miles Robbins (Dave), Will Patton (Frank Hawkins), Toby Huss (Ray). UHLOBO: Horror
IMINYAKA: 18 H/L/V UMHLAZIYI: Zowakha Mbatha
ABALANDELI balolu hlobo lwamafilimu bayawazi amanye aphume phambilini kusukela ngo-1978. Isuka lapho-ke indaba, sekuphele cishe iminyaka engama-40 ulaurie asinda umichael ebulala kwasani ahlangana nayo ngo-1978.
Indaba iqala ngezintatheli ezimbili ezivakashela umichael esikhungweni agcinwe kuso elulekwa ngudr Ranbir ngenhloso yokuxoxisana naye ngokwenzeka kuleyo minyaka.
Uyinto engakhulumi kulesi sikhungo nakuba lo dokotela wakhe eqinisekisa ukuthi useyakhuluma futhi wazi konke ngokwenzeka ngobusuku bezimanga.
Ulaurie ongunina kakaren nogogo ku-allyson uyazi ukuthi ngelinye ilanga umichael uyobuya azoziphindiselela ngakho-ke uvivile.
Indodakazi yakhe kayizwani naye ngoba icabanga ukuthi akathathi kahle ekhanda selokhu kwehla lesi sigameko kanti umzukulu wakhe umkhonzile. Okungicacele ekugcineni wuku- thi umndeni ubalulekile njengoba kunguye ogcina ebahlenga nakuba ehlulekile wukuhlenga umkhwe wakhe udave obulawa nguye umichael nabanye abaningi okufaka phakathi nezintatheli ebezilandela udaba, nenqwaba yamaphoyisa. Bonke laba ubabulala emuva kokweqa ngosuku olufanayo nalolo abulala ngalo eminyakeni edlule.
Engingakuthiphisa ngakho nje wukuthi uma ungeyena umlandeli walolu hlobo lwamafilimu kungakuhle uyibuke kusesemini, kusanezinye izinto ozozenza, hhayi usuzophuma e-cinema uqonde embhedeni. Ingenile e-cinema ngolwesihlanu lwayizolo.
zowakha@ilanganews.co.za
NGEZANSI nguhlu lwe-top 10 yamafilimu ahambe phambili ngokubukwa ngempelasonto edlule yomhlaka-12-14 October nabeholwa phambili YIHOTEL TRANSYLVANIA 3: A MONSTER VACATION ngokufaka imali (R18 751 419).