EZIBUHLUNGU KUTHONGATHI FC NGAPHAMBI KOWOMKHAYA
EZIBUHLUNGU kuthongathi FC kulimala umdlali obekubhekwe avale isikhala sikazakwabo ongekho ngenxa yesigwebo sekhadi elibomvu.
Uthongathi luzobhekana neRichards Bay FC kowenational First Division (NFD) namuhla ngeSonto ngo-15h30 erichards Bay Sports Complex.
Uthongathi lugqemeke udume lwengozi kulimala umdlali onesipiliyoni udiyo Sibisi okuthiwa udonseke imisipha ejimini.
Usibisi ulimala nje, bekubhekwe ukuthi avale isikhala sikasiyabonga “Villa” Vilane odonsa isigwebo sekhadi elibomvu.
Usibisi ekhuluma naleli phephandaba ngolwesihlanu emini uthe kumphathe kabuhlungu ukulimala esazi ukuthi uzobhekana nomkhaya.
“Bengiwubhekile lo mdlalo. Ngithe ngiyazama ukuphikelela nokudlala kwangavuma. Ngeke ngisaba yingxenye yawo.
"Kodwa-ke ngibathembile ozakwethu ukuthi bazowunqoba lo mdlalo.
"Singabuya namaphuzu amathathu ngoba abazi ukuthi siza nani, sifana nencwadi evaliwe kubona.
"Sibafihlele induku emqubeni sizowunqoba lo mdlalo noma kanjani,” kusho usibisi.
Umenzi Hlophe odlala esiswini kwibay uthi ngeke bavume ukuthi uthongathi lubashayele ekhaya.
Uthi kubajabulisile ukuthi uvilane ongumgadli wabo ngeke abe khona.
“Nguyena muntu ebesinovalo ngaye ngoba ithuba elincane alitholayo ulibeka enethini.
"Njengoba ezobe engekho nje, kufane nesibusiso lokho kithina.
"Kodwa lokho akusho ukuthi kufanele sibabukele phansi ngoba banabo abadlali abangavala isikhala sakhe.
"Ngempela bafana nencwadi evalekile kithina njengoba singazi ukuthi bazogadla ngobani phambili njengoba kuthiwa sekulimele nosibisi ebesibheke ukuthi aqale umdlalo.
Kodwa-ke ngeke sigxile kakhulu kubona, sizokwenza umsebenzi okufanele siwenze,” kusho uhlophe.
Imidlalo YENFD namuhla ngeSonto iqhathwe kanje:
Evolkswagen Dobsonville: Maccabi FC vs Real Kings 15h30.
Emhlathuze: Richards Bay vs Uthongathi FC 15h30.
Eboland: Cape Umoya United vs Witbank Spurs 15h30.
Evosloorus: Jomo Cosmos vs Pretoria University FC 15h30.