Uselusa izinkomo ungizwe Mchunu
Udinde isililo exoshwa
SELUSA izinkomo emakhaya emabhuqwini enkandla obewumsakazi wokhozi FM ungizwenkosi “Zulu Charmer” Mchunu, owaduma kakhulu kulo msakazo esakaza uhlelo lukamasikandi usgiya Ngengoma nokhathide “Tshathugodo” Ngobe.
Ukuyokwelusa kwakhe izinkomo kulandela ukuxoshwa kwakhe kulesi sikhondlakhondla somsakazo ngolwesine. Ekhuluma NELANGA Lange
Sonto ngolwesihlanu ntambama, ukuqinisekisile ukuthi impela umsebenzi umphelele.
Ngesikhathi ekhuluma nentatheli ocingweni uthe usekhaya enkandla, usezilusela izinkomo zakhe. Kuthiwa ungizwe ethola izindaba zokuxoshwa kwakhe ngemuva komhlangano obusemahhovisi alo msakazo, ukhihle esikanandi.
Bese kunamasonto amathathu emisiwe emsakazweni.
Ubeshayela uhlelo “Isigqi Sezwe” olungena ngomsombuluko kuya kulwesithathu kusukela ngehora lesibili ebusuku kuya kwelesine ekuseni. ILANGA Langesonto alitholanga kahle ukuthi uxoshelweni ungizwe njengoba okhulumela ISABC, unkz Neo Momodu, engafunanga ukukhipha imininingwane kuleli phephandaba, wathi isivumelwano phakathi kwabo nezisebenzi asivumi ukuba izindaba ezithinta umqashi nesisebenzi sakhe bangazikhuluma nabezindaba.
Nokho imithombo ithi uxoshelwe ukuba nguphoshozwayo okhipha izindaba ezibucayi zangaphakathi wazithuthela kwabezindaba, okusho ukungathembeki enkampanini.
Kuthiwa ungizwe ngesikhathi ekhishwa ohlelweni olubalwa nezihamba phambili kulo msakazo, usgiya Ngengoma, ugijime waya kwabezindaba waba ngumthombo ocashile, ebaxoxela ukuthi uxoshiwe ekubeni ediliziwe kulolu hlelo, nokwadala ukudideka kwabaningi.
Lokho kuthiwa kwazicasula kakhulu izikhulu zalo msakazo.
Okunye futhi okuthiwa kwambangela amazinyo abushelelezi yindaba yomcimbi wokubungaza umculi kamasikandi, umroza Fakude, owawukwahlabisa, ngemuva kokuhlukanisa kwakhe (umroza) unyaka ngo-2016 ngengoma ethi “Van Damme”.
Izinsolo zokushayisana okhozini ngendaba yalo mcimbi zagqama ngesikhathi sekumele kuyiwe kulo mcimbi - abaningi babelindele ukuba ukhozi lusakazele khona bukhoma kodwa kwangenzeka ngoba kuthiwa izikhulu zalo zashaya phansi ngonyawo, zathi ngeke kwenzeke lokho, ekubeni ungizwe wayesememezele emoyeni ukuthi luzosakaza kulo mcimbi bukhoma. Ungizwe waya kubo kwamroza kanti nangosuku lomcimbi nguyena owayephethe uhlelo.
Nakuba ekuqinisekisile ungizwe ukuxoshwa kwakhe okhozini FM, kodwa akathandanga ukudalula imininingwane ngezizathu eziholele kulesi sinqumo. Uyalele intatheli ukuba ixhumane nommeli wakhe, uvusi Tembe, wenkampani ingwanase-tembe Inc.
Ummeli uthe basazosicubungula isinqumo SESABC sokuxosha ungizwe bese bethatha isinyathelo esifanale. Uthe basamangele ngokuxoshwa kukangizwe ngoba bebesalinde incazelo kuyona ISABC ngokumiswa kwakhe.
“Sayibhalela ISABC ngokumiswa kukangizwe sayichazela ukuthi incazelo ngokumiswa kwakhe ayizwakali, sacela basicacisele kahle. Simangele uma ungizwe esesitshela ukuthi usexoshiwe ekubeni besisalinde impendulo ngokumiswa kwakhe,” kusho ummeli.
Uthe inkampani yabo ibisalungiselela ukufaka amaphepha enkantolo enkulu ngokumiswa kukangizwe.