UXOSHWE NGENYANGA AQASHWA NGAYO
UXOSHWE ngenyanga aqashwa ngayo okhozini FM ungizwe “Zulu Charmer” Mchunu. Ungizwe wafika okhozini ngoMfumfu (October) 2007, esakaza uhlelo “Isigqi Sezwe” olwalungena ebusuku ngehora lesibili kuze kube elesihlanu ekuseni. Ngaleso sikhathi kwakusengumnu Welcome "Bhodloza" Nzimande umphathisiteshi. Kulolu hlelo owayelusakaza waqhamuka nesigatshana esasithi “Ukhozi International” ayehlose ngalo ukuhlanganisa abantu baseningizimu Africa abahlala phesheya kwezilwandle nalabo abazinze ekhaya.
Lokhu kwamvulela amathuba amaningi okuba amenywe phesheya kwezilwandle njengoba ngo2009 wamenywa emcimbini wokugcotshwa kukamengameli wase- United States of America (USA) ubarack Obama, waba ngumsakazi wokuqala ngqa emlandweni woKhozi FM ukusakazela E-USA.
Walibangisa kulowo mcimbi ephathele u-oprah Winfrey isicholo kanye nesidwaba, waphathela umengameli Obama isihlangu.
Uphinde wamenywa nasenhloko-dolobha yasegeorgia, i-atlanta khona E-USA, emcimbini obizwa ngemartin Luther King Jr Celebration.
Ngo-2009 wangena ohlelweni usgiya Ngengoma, elusakaza ngokubambisana nokhathide “Tshathu-godo” Ngobe, bebizwa ngotalagu - nakhona uhaqwe yinqwaba yezi-nkinga, emiswa emsebenzini abu-ye abuyiselwe, kwagcina ngokuba bamkhiphe kulo bambuyisela kulolo owayeqashelwe lona efika emsakazweni.
Ungizwe waziwa njengomuntu osithandayo kakhulu isintu njengoba isikhathi esiningi lapho ehamba khona umqhele ubungasali ekhanda lakhe.
Phakathi kwemicimbi emikhulu ake ayenza esasebenza okhozini singabala ukumbulwa kwetshe likamgqumeni “ibhova Likadikadika” Kwagxobanyawo, enquthu ngo-2012, lapho wayenikele ngezi- nkabi eziyishumi emndenini wakwamseleku, koninalume webhova. Ukuphindile futhi kumphatheni “Mfaz’ Omnyama” Khumalo, nakhona wakhipha izinkabi eziyishumi, emenzela umcimbi wokwembulwa kwetshe.
Nakuphuzushukela Bhengu enkandla wenze sona leso ngezinkabi eziyishumi, embula itshe lakhe lengcwaba.
Ubekhona ngesikhathi umnu Stanley Dladla, nomnu Dumsani Goba belibangise esilweni samaZulu, ugoowill kabhekuzulu, beyocelela abaculi ukuphila ngemuva kokuba indima kamasikandi ihaqwe inkinga yokufa kwabaculi.
Uke wenza umcimbi omkhulu kamasikandi, utalagu Maskandi Festival, ngokubambisana naye utshatha.
Kuhlukana inhloko nesixhanti nokhozi FM nje, ubesesakaza izinsuku ezintathu ngesonto engena ngehora lesibili ekuseni aphume ngelesihlanu ekuseni.
ZIYIHLABE zayihlikiza izinduna zabalandeli bakamaskandi ezihola amaqembu ahamba phambili emculweni wesintu, eyokuxoshwa kobengumsakazi wokhozi FM, ungizwe Mchunu ( osesithombeni).
Izinduna zisole umsakazo ngokuthi uthathe isinqumo esinzima, zithi lo msakazi ubezikhuthalele izinto zesintu futhi engazenyezi ngazo. Umnu Veloh Bhengu, ohola abalandeli beqembu Amageza Amahle, uthe ukunotha kolimi lukangizwe emsakazweni, yikhona obekujabulisa abalandeli bakamaskandi nakuba kade esekhishiwe ohlelweni lwawo.
“Kubuhlungu kakhulu okwehlele ungizwe, nakuba kade enakho lokho kwakhe, kodwa ubekwazi ukunandisa uhlelo. Nasemicimbini amagalelo akhe ayaziwa kakhulu. Sonke siyazi ukuthi alikho isoka elingenasici, kodwa ukwazi kwakhe nomlando wesizulu kungezinye zezinto ebesimthandela zona.
"Kwehlule ngisho sekudlule umgqumeni emhlabeni obekwaziwa ukuthi uhambisana naye, kodwa akazange ayizonde indidane, abambe amagqubu,” kusho uveloh. Umnu Mvumeleni “Rank” Zwane, oyinduna yabalandeli bakakhuzani Mpungose, uthe akekho ongazi ukuthi ungizwe uwukhulise kangakanani umculo wesintu.
Uthi akangabazi ukuthi ubesazokwenza okuningi emsakazweni. “Akwehlanga kahle ukuxoshwa kwakhe futhi ngibona kusazoba nzima ukuba kutholakale umuntu ofana naye,” kusho umnu Zwane.
Umnu Mhlengemali “Mbhinqo” Mthembu, wosaziwayo, uthe into ebimchaza kakhulu ngalo msakazi, wukuthi ubewulwela umaskandi ukuze uphakame uye phezulu. Uthi okwenziwe umsakazo akukhombisanga ukukhathalela abalaleli.
“Le ndoda inekhono nothando lomculo wethu. Nakuba ibinamaphutha kodwa ibisimela ezintweni zikamasikandi,” kusho umnu Mthembu. Ngakolunye uhlangothi, umnu Qhoshakufanele “Soh” Mkhonza wabalandeli bakamjikijelwa, uthe isizwe samazulu sizolimala ngoba ungizwe ubeyinsika yaso emsakazweni.
“Umchunu ubungeke umthole eseqhakambisa okwezinye izizwe, akezenyezi ngokuba ngumzulu. Akukho soka lingenasici, kodwa ukhozi luyazilimaza lona ngalesi sinqumo. Nyakenye sashonelwa umlandeli kamaskandi, usalabemkhuluma Xulu, emcimbini owawusecurries Fountain, wafika ungizwe Kwanongoma ezoseseka ekubeni wayengasekho ohlelweni,” kusho umnu Mkhonza.