AMAWESELI ABEVULA IMANSE
UMHOLI webandla lamaweseli asenatal West District, umbhishobhi Thamsanqa Dlamini, ubonga isekethe azalwa kuyona ngokuzinza njengoba ethi uyajabula ukuthi useze uyaphuma esikhundleni engakaze abizelwe ezigcawini zokuqondiswa kwezigwegwe kwamalungu asephambene nenqubo yebandla.
Ucele abazalwane bebandla ukuba lokhu abebekwenza kuyena baqhubeke bakwenze nakumbhishobhi ozongena emuva kwakhe, kungathi uma sekuphume yena bese kuqala izinkinga.
Umbhishobhi Dlamini ubeshumayela emini ngomgqibelo owedlule enkonzweni yokuvulwa kwendlu (manse) ehlala umfu Vuyo Dlamini ongumengameli wamaweseli ase-edendale Circuit 805 emgungundlovu.
Le ndlu ebivulwa ayiyintsha kodwa beyivuselelwa njengoba yakhiwa ngo-1966. Umuntu oqavile ovelayo okuthiwa wayehamba phambili kwakhiwa le ndlu ngalowo nyaka, le sekethe isaholwa ngumfu James Howard Msimang, ngusol Sibusiso Nyembezi, ongasekho.
Eqala intshumayelo, umbhishobhi Dlamini ubonge amagosa aseEdendale Circuit ngokuba nozinzo njengoba ethi yiwona ayizinjini zebandla. Uthe yiwona anamandla okulawula ibandla kangangoba uma kuqine isandla sawo ibandla ngeke liye ndawo.
“Ngiyophoxela kakhulu uma sekuvuka amacala lapha e-edendale njengoba lena kuyisekethe nathi esizibuka kuyona. Singabefundisi namhlanje ngenxa yezimfundiso ezinhle esikhuliswe ngazo lapha ekhaya.
“Ngiyacela ukuba nihlale nizothe kanje futhi nibambane ngezandla kungathi uma mina sengehlile esihlalweni sobubhishobhi bese nimisa imihlwenga nenze into esingakaze siyibone kule sekethe selokhu yaba khona,” kusho umbhishobhi Dlamini.
Umnu Thembinkosi Hlela weNatal West District Task Team ubonge i-edendale Circuit ngokuzinikela kwayo icabangela umalusi ngokuvuselela kabusha indlu ahlala kuyona.
“Lo msebenzi ngabe awuphumelelanga ukuba besinamagosa athithibele, ngakho ngibonga ukuphaphama kwawo,” usho kanje.
Umfu Vuyo Dlamini, obekuvulwa indlu ahlala kuyona, ubonge ukuhloniphana namagosa uma kukhona eliza nemibono emihle ezothuthukisa ibandla.
“Ngiyajabula ukuthi lapho engisuke ngidlule khona akufi lutho njengoba amasekethe engiphuma kuwona esaphila nanamhlanje. Ngibonga unkulunkulu ngoba wangipha ukuba ngibe umholi oqotho,” usho kanje.