Kubhidlizwe umuzi kasfiso Ncwane
Baqale ngamafasitela, izicabha, ama-tiles nezitini
KUPHELILE ngomuzi kasfiso Ncwane ashone ngo-2016 ewakha e-adams Mission emuva kokuba izigilamkhuba seziwendlule kwasala izindonga.
ILANGA Langesonto lithole ukuthi usfiso ushone eseqedile ukwakha indlu engurawondi kule ndawo enemizi emihle eyakhiwe ngabampisholo eningizimu yeTheku.
Kuthiwa le ndlu ibisinakho konke njengoba bese kusele ukuba kungenwe, kuhlalwe kuyona.
Leli phephandaba lizifikele mathupha kulo muzi osuphenduke inxiwa njengoba sekusele izindonga.
Likhulume nomakhelwane onxuse ukuba ligodlwe igama lakhe, othe: “Usfiso ushone eseqedile ukwakha umuzi lapha e-adams Mission. Ubesengangena noma yinini, kwazise bese kufakwe amafasitela, izicabha nophahla lwama- tiles. “Ubekhombisa uthando lokuzohlala lapha ngoba ubefika njalo ezobheka le ndlu. Ubenomoya omuhle kakhulu ngoba ubefika asibingelele endaweni njengomakhelwane bakhe.”
Uthe lezi zigilamkhuba zaqala ngokukhipha amafasitela, zalandelisa ngesicabha, zakhipha nama- tiles phezulu.
“Zigcine sezintshontsha ngisho izitini imbala kwangathi kakukaze kube khona lutho. Selokhu ashona kangikaze ngibone muntu ozobheka leli nxiwa, ngisho nomkakhe imbala kangikaze ngimbone lapha.
“Sekuze kwamila ukhula enxiweni. Sikhathazekile siwumphakathi ngokunganakwa kwenxiwa likasfiso, besingathanda kube- khona okwenzekayo noma kwakhiwe indawo eyisikhumbuzo sakhe,” kusho lo makhelwane.
Unina kasfiso, ufikile Ncwane, uthe uyazi ukuthi indodana yakhe inalo inxiwa kodwa akakaze alubhade kulona.
“Usfiso washona esanda kungitshela ukuthi unendawo ayithenge e-adams Mission. Wangitshela ukuthi useqedile ukwakha futhi wayephezu kwezinhlelo zokuyongikhombisa indlu yakhe.
“Ngebhadi washona engakwenzanga lokho. Kuyimanje kangiwazi nokuthi ungakuphi. Kangisafisi ukukhuluma kakhulu ngezindaba ezithinta usfiso ngoba zingifikisela ngezinyembezi,” kusho ufikile.
Umnu Mbongeni Makhanya, oyinduna e-adams Mission, uthe: “Ngingakuqinisekisa ukuthi usfiso ubenalo inxiwa lapha kodwa eyendlu kangiyazi. Njengoba engasekho nje ngu-ayanda ozonquma ukuthi wenzanjani ngalo. Ngigcine ukukhuluma no-ayanda ngonyaka odlule, ubekhuluma indaba yokuthi inxiwa usalidinga futhi usazolisebenzisa. Ngaleso sizathu sizomlinda ngeke silinike omunye umuntu.”
Selokhu ashona kangikaze ngibone muntu ozobheka leli nxiwa.