AMAHLAZO NGOKUPHATHWA KWE-SASCOC
KUVELE amahlazo embikweni obulindelwe ngabomvu wumphakathi waseningizimu Afrika ngokuphathwa kwesouth African Sports Confederation and Olympic Committee (Sascoc).
Kulo mbiko kuvele ukuthi uqhekeko ezikhulwini zale nhlangano luholele ekwehlulekeni kwebhodi ukwenza umsebenzi walo, okugcine sekwenza ukuthi le nhlangano inhlanhlathe, ingenzi umsebenzi ngendlela efanele.
Kuvele ukuthi kuningi obekwenziwa kungalandelwa inqubomgomo yenhlangano nemithetho ebekiwe. Ukuxhashazwa kwemali eshisiwe, kuhanjwa ngamabhanoyi ngenye yezinto ezivelile kulo mbiko ohlanganiswe yikhomishana ebiyenza uphenyo, ebiholwa yijaji eselathatha umhlalaphansi, uralph Zulman, elekelelwa ngudkt Ali Bacher nommeli, ushamima Gaibie.
Ikhomishana yayiqokwe ngowayengungqongqoshe wezemidlalo phambilini, umnu Thulas Nxesi, ngemuva kwezinsolo ezavela zokuthi umengameli wesascoc, umnu Gideon Sam, udala uqhe-keko emalungwini ebhodi, nokuthi ubengundlovukayiphikiswa, enza izinto ngendlela yakhe, egodla olunye ulwazi olubalulekile enhlanganweni futhi engawambandakanyi ekuthathweni kwezinqumo ezinqala.
Le nhlangano ithathwa njengewumgomgodla kwezemidlalo kuleli.
Okugqame kakhulu kwizincomo eziphakanyiswe yikhomishana wukuba kukhucululwe kule nhlangano, nokuthi kuguqulwe indlela okuqokwa ngayo amalungu ebhodi nezikhulu eziphezulu.
Umengameli olandelayo wale nhlangano kuphakanyiswe ukuba azimele, aqokwe yikomidi elizimele, futhi angabi nabudlelwano nezinye izinhlaka zezemidlalo.
Unkz Tokozile Xasa ( osesithombeni), ongungqongqoshe wezemidlalo kuzwelonke, uphakamise ukuba imihlomulo yokuhamba ( travel benefits) kukamengameli nesikhulu esiphezulu kule nhlangano kumele idingidwe emhlanganweni olandelayo webhodi lesascoc. Wathi futhi ukuvakashela emazweni angaphandle ngokomsebenzi kumele kukaleke.
Uqhube wathi kumele kwenziwe ucwaningo mabhuku oluzimele, kubhekwe isimo semali yale nhlangano okungenani eminyakeni emihlanu, futhi kubhekwane ngqo nokuxhashazwa kwemali.
Kufanele kuthi kushaya umbasa ngonyaka ozayo isascoc ibe isikwenzile okuyizincomo eziqukethwe yilo mbiko.