Bakhonjwa kwimbewu
Ubuhle useqalile ukuqopha kulo mdlalo
SEKUVELE ezithi uzovumbuka kwimbewu: The Seed umlingisi okuke kwavela ukuthi izinto ziyambhedela empilweni, owazakhele udumo kwigenerations, umelusi Yeni.
ILANGA Langesonto lihabule ukuthi lo mlingisi ozakhele udumo edlala indawo kaphenyo kwigenerations uthole ikhaya elisha kwiMbewu ekhonjiswa phakathi nezinsuku esiteshini esizimele, i-e.tv.
Ngokuthola kwaleli phephandaba, lo mlingisi okuke kwanemibiko yokuthi uxinwe wukugula, kuthiwa uzoqala ukubonakala kulo mdlalo ngonyaka ozayo nakuba kungakacaci ngendawo azoyilingisa.
Leli phephandaba liphinde lahabula nokuthi iziphalaphala ezimbili zabalingisi, unatasha Thahane nobuhle Samuels, bangabanye babalingisi abajoyina lo mdlalo osematheni kulezi zinsuku njengoba busanda kuchitheka bugayiwe kuphuma izimfihlo zomndeni wakwabhengu kuwona.
Okhulumela lo mdlalo, umatodzi Mashau, akafunanga ukuphawula ngendaba kanatasha nomelusi kodwa ukuqinisekisile ukuthi ubuhle useyingxenye yalo mdlalo.
Umatodzi uveze ukuthi ubuhle useqalile ukuqopha kulo mdlalo kanti kulindeleke ukuba aqale ukubonakala ngomasingana (January) wonyaka ozayo.
Kuzokhumbuleka ukuthi ngo2016 ubuhle uke wayindaba egudwini ngenxa yezinqe ezinkulu ezishiye abantu bekhuluma nxa zonke.
Abanye bebengakholwa wukuthi yizinqe zakhe zangempela, besola ukuthi ngezokufakelwa, kuze kwafika lapho ephumela khona obala, wacacisa ukuthi akuzona ezokufakelwa kodwa ngezendalo.
Ethintwa YILANGA Langesonto ubuhle, ozakhele udumo ngokudlala indawo kamatshidiso kumuvhango, uthe ujoyine lo mdlalo ngoba indawo azoyidlala ikhuluma naye ngqo.
“Le ndawo yehlukile kunendawo abantu abangazi ngayo,” esho engeza ngokuthi kade azi ngembewu kanti akuthandayo ngayo wukuthi ikhuluma ngezinto ezithinta impilo yabantu abajwayelekile.
Ubuhle, ozodlala indawo kazandile kulo mdlalo, uphinde waveza nokuthi abantu kumele balindele okuningi okuzofika nomlingiswa wakhe kulo mdlalo njengoba engowesifazane ozimele futhi owaziyo ukuthi ufunani empilweni.
Uthembise ukuthi uzokwenza konke okusemandleni akhe ukuqinisekisa ukuthi le ndawo uyilingisa ngokukhulu ukuzimisela nokuzikhandla.
Uphethe ngokuthi njengoba esezozinza ethekwini uyazifela ngokuzulela ebhishi kanti nokudla okubabayo yinto yakhe.
Uphinde waveza nokuthi usazoqhubeka nomculo njengoba maduze engase adedele enye yezingoma zakhe.
lucky.cain@ilanganews.co.za
Le ndawo yehlukile kunendawo abantu abangazi ngayo.