Umholi weda uthi akasona isichuse
Ugcizelele ukuthi izinqumo zithathwa nguyena
AKUDIKIZI nqulu ngamahlebezi asabalele ngekusasa lakhe kwida umholi waleli qembu KwazuluNatal, umnu Zwakele Mncwango.
Umncwango ekhuluma ngokukhethekile NELANGA Langesonto, uthe okubalulekile kuyena wukubumbana kwekhokhasi yalesi sifundazwe nokuyisa leli qembu okhethweni oluyimpumelelo ngonyaka ozayo.
Lo mholi ukhulume kanjena ngemuva kwemibiko yokuthi angase akhonjwe indlela kuleli qembu ngezinsolo zokuthi udlela esitsheni esisodwa neqembu elibusayo, I-ANC.
Lokhu kulandela ukuvela kwemibiko yokuthi uphezu kwemizamo yokuketula usotswebhu weda, umnu John Steenhuisen, ngoba ethi akanazo iziqu zemfundo ephakeme.
Umnu Mncwango utshele leli phephandaba ukuthi akananxa nomnu Steenhuisen futhi uyamhlonipha njengosopolitiki osemnkantshubomvu eqenjini.
“Okwamanje ngeke ngikwazi ukuphawula ngemibiko esabalalele ngoba eminingi yayo isengamahlebezi nje antanta emoyeni,” kusho umnu Mncwango othi uyakweshwama ukuthi kunemibiko ethi udlela esitsheni esisodwa neANC.
“Engikwaziyo wukuthi ngithembekile kwida. Abantu bayohlale bekhuluma. Okubalulekile kithina wukuba singadidiseki kodwa sigxile kulokhu okubalulekile kubantu basekzn,” kusho umncwango ojoyine leli qembu ngo-2001.
Uthi ngesikhathi ejoyina IDA ubengabhekile izikhundla njengoba ebezisebenzela kahle emkhakheni awufundele we-electrical Engineering.
“Ngijoyine ngoba ngifuna ukuba yingxenye yoshintsho ezweni engiphila kulona. Ngenxa yeqhaza ebengilibamba ngaphakathi eqenjini yikhona okungenze ngakhula kulona njengoba sengihola isifundazwe,” kulanda yena, eveza nokuthi ulwazi lwezepolitiki uluncele kumnu Roger Burrows oke wahola leli qembu Kwazulu-natal.