UTHI AKASONA ISICHUSE
Umncwango, odabuka Kwanongoma, nguyena ongaqhoqhobala isikhundla sokuba ngundunankulu wesifundazwe uma IDA ingase idle umhlanganiso kulesi sifundazwe okhethweni lwangonyaka ozayo. Uthi okungaba seqhulwini kuyena wukwakha amathuba emisebenzi, ikakhulukazi kubantu abasha, wukuthuthukisa umnotho nokulwa nenkohlakalo athi idla lubi esifundazweni.
Lesi sifundazwe sihamba phambili ngokubulawa kosopolitiki ikakhulukazi uma sekusondele ukhetho - umncwango uthe lesi yisihlava esibi kakhulu okumele kuliwe naso.
Mayelana nokusabela impilo yakhe, lo mholi uthe ngeke angethuki kodwa okubalulekile wukuqhubeka nokulwa nobubi obenzekayo. Uthi nezishoshovu ezifana nodkt Nelson Mandela kazizange zikuvumele ukwesatshiswa ngesikhathi zilwa nobandlululo.
Uvumile ukuthi useke wakuthola ukwesatshiswa kodwa lokhu akumtheni amandla njengoba esebenzisana nomnyango wezobuNhloli futhi ehlale emehlo mane.
Ukuphikile ukuthi IDA yiqembu labamhlophe elihlose ukufeza izimfuno nezimfundiso zabo. Uthi leli yiqembu lawo wonke umuntu ngaphandle kokukhetha ibala.
“Uma ubheka IDA yilona qembu elinalo lonke uhlobo lwabantu futhi elingakhethi bulili uma liya ngasebuholini. Abasho njalo basuke beqhuba ipolitiki engayi ndawo,” kusho yena. Umncwango uphinde wakubeka kwacaca ukuthi njengoba eqhoqhobele lesi sikhundla, akasona isichuse kodwa ungumholi ngempela.
“Ngelanga ngizizwa ukuthi akusemina ohola leli qembu nakuba ngisesikhundleni, ngiyokwesula. Yimina oholayo futhi othatha izinqumo,” esho ekucacisa ukuthi uma kukhona okuhle okwenziwa YI-ANC, kumele kushayelwe ihlombe.
Uthi emndenini wakubo akusiyena kuphela ongusopolitiki njengoba uyise omncane kungumnu Albert Mncwango oyimeya yakwaNongoma futhi ongumholi WE-IFP. Uthi bayahloniphana kakhulu noyise omncane njengoba uma behlangene emndenini ipolitiki yinto engakhulunywa nhlobo.